УИХ-ын чуулганы хуралдаан үргэлжилж байна.  хуралдаанаар УИХ-ын Хянан шалгах түр хороо (Хилийн боомтуудаар ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч байгаа хүндрэлийг шалган тогтоох) -ны хугацааг сунгах асуудлыг хэлэлцэж байна. 

Энэ үеэр УИХ-ын гишүүн С.Чинзориг "Түр хороо байгуулагдаад зургаан сар болж байна. Түр хороо ямар ажил хийж, ямар үр дүнд хүрэв. Тухайлбал, гэрээний нууцлалтай холбоотой асуудлууд хэзээ нийтэд ил болох вэ? Төмөр замын гэрээ ил байгаа юмуу далд байгаа юмуу? Түр хорооны гишүүн Т.Доржханд 44 их наядын хулгай гарсан гээд байх юм. Түр хороо яагаад иргэд, олон нийтэд бодитой мэдээлэл өгөхгүй байна вэ? 2018 онд Ч.Хүрэлбаатар сайд нүүрстэй холбоотой асуудлыг шалгаад 370 орчим мянган тонн нүүрс алдагдсан байх магадлалтай байна. Улсын дугаар нь тодорхой, хоёр талдаа хоосон орж гарсан мэдүүлэгтэй байгаа асуудлыг ярьж байсан. Үүнийг тухайн үед хууль хяналтын байгууллагад шилжүүлсэн ч хариу байхгүй. Хууль хяналтын байгууллагад хэрэгсэхгүй болсон хаагдсан ямар хэргүүд байгаа юм бэ" гэсэн асуултад 

Үүнд Хянан шалгах түр хорооны дарга Г.Ганболд "Нотлох баримт цуглуулах, гэрч дуудаж байцаах гээд цаг хугацаа орж байгаа ажлууд их байна. Шинжээч нар цуглуулсан материал дээр ажиллаж байна. Түр хороо үүргээ гүйцэтгэж байгаа. Өмнө нь чуулган дээр гишүүд нүүрсний хулгайн асуудлаар ярьсан ч хэн ч тоодоггүй байсан нь үнэн. Түр хороо ажиллаж нүүрсний хулгайн асуудал нийгмийн анхаарлын төвд орсон. Оффтейк гэрээ нууц гэрээ учраас УИХ-ын гишүүд ч танилцах боломжгүй. Харин УИХ-ын Түр хороо хуулийн дагуу нууц гэрээтэй танилцах боломжтой. УИХ-ын даргын захирамжаар Хяналтын Ерөнхий сонсгол хийх ажлын хэсэг байгуулагдсан. Энэ хүрээнд нууц гэрээнүүдийг энэ сарын 21-ны өдөр ил болгож нээлттэй хэлэлцэнэ. Гэрээ ил болохоор нэрс ил болно. Засгийн газраас гэрээг нууцаас ил гаргахадажилд анхаарч ажиллана гэж бодож байна. Т.Доржханд гишүүн түр хорооны гишүүн ч хуралдаа нэг ч суугаагүй. Түр хорооны хуралдаан дээр 44 их наядтай холбоотой асуудал яригдаагүй. Т.Доржханд гишүүн энэ тоог яаж гаргаж ирснээ тайлбарлах ёстой. Түр хороо одоогоор 2,5 сая тонн нүүрсний хулгайн нотлох баримт цуглуулах ажлыг хийж байна. Т.Доржханд гишүүн буруу мэдээлэл өгсөн бол уучлал хүсэх ёстой" гэлээ. 

П.ГОО