Аливаа орны хувьд хөрш зэргэлдээ, хаяа нийлэн орших улс оронд нь өрнөж буй нийгэм, улс төрийн амьдрал ихээхэн анхаарал татдаг. Тиймдээ ч Монголд өрнөсөн эсэргүүцэл олон улс, тэр дундаа хөрш ОХУ-ын хэвлэл, судлаачдын анхаарлыг ихэд татаж байна. Оросын хэвлэлээр өдөр бүр Монголын эсэргүүцлийн талаарх мэдээ, нийтлэл гарч, хөрш орны улс төрийн амьдралыг сонирхохоор сэтгүүлчид улс төр судлаачдын байр суурийг сонсож байгаа юм. Энэ удаад Эрхүүгийн "ТИВИСИ" телевиз "Евразийн тойм" медиа төслийн удирдагч, судлаач Владимир Бережныхтэй уулзан, байр суурийг нь сонирхсныг товчлон хүргэж байна. 

Монгол Улсын Ерөнхийлөгч Ухнаагийн Хүрэлсүх Хятад, Японд амжилттай айлчлал хийсний дараа Монголд эсэргүүцэл үүсэх болсон шалтгааныг бодож эргэцүүлэх л ёстой гэж Владимир Бережных "ТИВИСИ" телевизэд өгсөн ярилцлагынхаа үеэр мэдэгджээ. Монголын өнөөгийн засгийн газар эсэргүүцлийн үр дүнд төрийн эрх мэдэлд гарсан, гэхдээ тухайн үед эсэргүүцлийн үндэслэл нь өнөөгийнхтэй харьцуулахад нэг их ноцтой байгаагүй гэж тэрбээр өгүүлсэн байна. 

"Одоо бол ноцтой үндэслэлтэй байгаа. Гэхдээ би 14 тэрбум доллар гэсэн тоонд итгэхгүй байна. Энгийнээр тооцоход л 6 сая тонн нүүрс 14 тэрбум долларт хүрэхгүй" хэмээн Владимир Бережных өгүүлжээ. 

Гэхдээ энэ нь Монголын хувьд их тоо, энэ талаар мэдээлэл гарахад ард түмэн үймсэн хэмээн тэрбээр онцолсон байна.

"Хил дээр нүүрс хулгайлж байгаа тухай яриа гараад хоёр жил болж байхад чухам яагаад одоо эсэргүүцэл дэгдэв гэдэгт л асуудлын гол нь байгаа юм. Үнийн дүн зөрж байгаа талаар Хятадын тал аль эрт л мэдэгдсэн. Тиймээс, яагаад чухамхүү одоо эсэргүүцэл эхлэв ээ гэдэг нь  бодох л асуудал" хэмээн Бережных онцолсон байна. 

Түүний үзэж байгаагаар Улаанбаатарт үүссэн эсэргүүцэл эхлэх болсон хоёр шалтгааныг авч үзэх ёстой гэнэ.

Хятад, Япон руу Монголын Ерөнхийлөгч амжилттай айлчлаад ирсэн гэдгийг Бережных онцоллоо. Түүнчлэн, Монголд саяхан АНУ-ын шинэ элчин сайд Ричард Буанган томилогдон ирсэн бөгөөд тэр ирэнгүүтээ л монгол хэл сураад эхэлсэн гэж судлаач онцолсон байна. Бережных Буанганыг PR болон "зөөлөн хүч"-ээр мэргэшсэн хүн гэжээ.

"Тэр Монголд томилогдсон нь АНУ Монголыг ихэд сонирхож байгааг илтгэж байна. Америкчууд энэ нутгийг багахан "халуун цэг" болгохоор шийдсэн гэдгийг үгүйсгэх аргагүй юм" хэмээн Бережных онцолжээ.

Хятад руу хий нийлүүлэх хоолойг Монголоор дамжуулах төсөл нь далайн чанад дахь олон хүнийг тавгүйтүүлсэн, АНУ Монголыг "гарын дор" гэж үздэг ч америкчуудад ашиггүй хийн хоолойг Монголоор дайруулахаар болсон гэж Бережных онцолсон байна. 

Г.Бямбасүрэн