Ардчилсан намын бүлгийн дарга О.Цогтгэрэл энэ долоо хоногийн мягмар гарагт хийсэн мэдээллийнхээ үеэр " "ЭрдэнэсТавантолгой"-д  хэлтсийн дарга байсан хүн л Казакстанд хороолол барих хэмжээнд баяжсан байна" хэмээн мэдэгдсэн. 

Эх сурвалжууд О.Цогтгэрэлийн тодотгон хэлсэн хүн бол бол Эрдэнэс тавантолгой компанийн Дотоод хяналт удирдлагын газрын дарга Х.Нурлат хэмээн бичжээ. Эрдэнэс Тавантолгон асуудал сөхөгдөхтэй зэрэгцэн буюу өнгөрсөн сард Х.Нурлатыг АТГ-аас  эрх мэдэл, албан тушаалаа урвуулан ашиглаж бусдад давуу байдал олгосон гэх үндэслэлээр саатуулан шалгаж эхэлсэн байдаг. Тэгвэл түүнийг нүүрсний  экпорт дундаас олсон их хэмжээний мөнгөө  Казакстан руу гаргаж, орон сууцны хороолол барьж байгаа нь ийнхүү олон нийтэд ил боллоо. 

Тэгвэл газрын даргаас орон сууцны хорооллын бизнес эрхлэх хүртлээ хөргөжсөн Х.Нурлат гэж хэн бэ?

-Х.Нурлат нь Монголд ШУТИС-ийг цахилгаан, системийн инженер мэргэжлээр төгссөн, Казакстанд Казак үндэсний техникийн их сургуулийг төгссөн нэгэн юм. Түүний хувьд ажлын гараагаа 2007 онд Шубаркаль ХК-д уулын инженерээс эхлүүлжээ. Үүний дараа Эрхэм Майнинг компанийн уурхайн иненер захирлын албыг гурван жил хашиж, эргээд Шубаркаль компанийнхаа зөвлөхөөр 2014 он хүртэл ажиллаж, 2014 оноос ХХК-ийн захирал, 2016 оноос Эрдэнэс Тавантолгой компанид Уурхайн захиргаа уирдлагын газрын даргаар ажиллаж эхэлсэн байна. 

Харин 2016 оноос тус компанид удирдах албан тушаал хашиж эхэлсэн бөгөөд 2020 оноос хойш хоёр жил АТГ-т хөрөнгө орлогоо мэдүүлсэн байгаа юм. Мэдээж бусдын жишгийн дагуу албан тушаал ахих хэрээр хөрөнгө орлого нь нэмэгдсэн.

Тодруулбал, Х.Нурлатынх 2020 онд жилийн 249 сая төгрөгийн орлого олж байсан бол 2021 онд 425 сая төгрөг болж нэмэгдсэн байна.

Мөн хөрөнгө орлогын мэдүүлэгтээ 390 сая төгрөгийн үнэлгээ бүхий нэг орон сууц, нэг гараж, 147 сая төгрөгийн үнэлгээ бүхий хоёр машиныг бүртгүүлжээ. 2020 онд тэрбээр 100 сая төгрөгийн үнэлгээтэй хоёр машин мэдүүлж байсан бол дараа жил нь ийнхүү машины үнэлгээ өссөн байгаа юм.  Түүний хөрөнгө орлогын мэдүүлэгт 465 сая төгрөгийн үнэлгээ бүхий үхэр адуу, 80 сая төгрөгийн авлага, 65 сая төгрөгийн үнэт эдлэл байгааг дурьдагдсан байна. 

П.ГОО