Өвлийн улирал эхэлсэнтэй холбоотойгоор Украинд үзүүлэх тусламжаа нэмэгдүүлэхийг Хятад улс олон улс болон хүмүүнлэгийн байгууллагуудад хандан уриалжээ. Энэ талаар НҮБ-ын Аюулгүйн зөвлөлийн хурал дээр НҮБ-ын дэргэдэх БНХАУ-ын байнгын төлөөлөгч Гэн Шуан мэдэгдсэн байна. 

"Хүмүүнлэгийн тусламжийг нэмэх шаардлагатай. Украины ард түмэн дайн, өвөл гэсэн давхар асуудалтай нүүр тулаад байна. Цахилгаан эрчим хүч, халаалт болон бусад нийлүүлэлтийн хомстол нүүрлэсэн энэ үед хүмүүнлэгийн тусламжийг эрс нэмэгдүүлэх хэрэгтэй. Олон улс болон хүмүүнлэгийн байгууллагууд Украины дэд бүтцийг сэргээхэд туслах ёстой" хэмээн Гэн Шуан мэдэгджээ.

Түүнчлэн ийм нөхцөлд хамгийн ихээр хохирч байгаа нь хүүхдүүд гэж Гэн Шуан онцолсон байна. Тиймээс хүмүүнлэгийн тусламж үзүүлэхдээ хүүхдүүдийн хэрэгцээг харгалзан үзэхийг БНХАУ уриалж байна хэмээн Гэн Шуан мэдэгджээ.

Г.Бямбасүрэн