УИХ-ын гишүүн асан Ж.Батзандангийн хоригдох хугацаа өнөөдрөөр дуусгавар болж, суллагдаж байгаа талаар эх сурвалжууд мэдээлж байна.

Түүнийг өнгөрсөн аравдугаар сарын 6-7-нд шилжих шөнө  АТГ-аас баривчлан саатуулсан. Тэрбээр Хөгжлийн банкнаас их хэмжээний зээл аваад зээлээ төлөөгүй гэх асуудлаар ийнхүү хоёр сар хоригдлоо. 

Ж.Батзанданг туслахаараа дамжуулан, Капитал банкнаас 12 гаруй тэрбум төгрөгийн зээл авсан гэж буруутгаж байгаа юм. Капитал банк нь Хөгжлийн банкнаас зээлсэн 227 тэрбум төгрөгийг 90 гаруй аж ахуй нэгжид дамжуулан зээлдүүлсэн бөгөөд УИХ-ын гишүүн асан Ж.Батзандангийн зөвлөх Г.Аюулгүйн нэр дээр бүртгэлтэй “Азийн бамбар” компаниар хоёр удаа 3-5.7 тэрбум, “Элит цахмаг” компаниар 3.8 тэрбум төгрөгийн зээл авсан нь батлагдсан байдаг. 

Хөгжлийн банкны гэх хэргийг шалгах шатанд дээрх дамжуулан авсан зээл нь УИХ-ын гишүүн асан Ж.Батзандангийн эхнэрийн нэр дээр бүртгэлтэй компанийн данс руу орсон нь илэрсэн гэх мэдээлэл гараад байгаа юм. Уг зээлийг авахдаа Ж.Батзандан, Г.Аюулгүй нар “Капитал” банкны удирдлагатай уулзан нөлөөлсөн гэдэг нь ч тодорхой болсон талаар эх сурвалжууд бичиж байна.

Ямартай ч түүнийг хоёр сар хорьсны эцэст ийнхүү суллажээ. 

П.ГОО