УИХ-ын гишүүн Т.Доржханд, Ш.Адьшаа, Ж.Батсуурь, Д.Бат-Эрдэнэ, Б.Бейсен, Д.Ганбат, Н.Ганибал , С.Одонтуяа, О.Цогтгэрэл нар УИХ-ын дарга Г.Занданшатарт шаардлага хүргүүллээ. Энэ талаар ХҮН-аас өнөөдөр /2022.12.05/ мэдээлэл хийлээ.

ХҮН-ын дарга, УИХ-ын гишүүн Т.Доржханд “Нүүрсний хулгайн асуудлыг санаатай, санамсаргүйгээр тодорхой бус болгож, хөөсрүүлэн саармагжуулах ажил яваад байна. Тиймээс ХҮН-аас АН-ын бүлгийн гишүүдтэй хамтран энэ долоо хоногт багтаан нийтийн сонсгол хийхээр шийдвэрлэж, УИХ-ын дарга Г.Занданшатарт шаардлага хүргүүлж байна.

Хулгайг УИХ дээр нээлттэй хэлэлцье. Хулгайд зориулсан түр хорооны ажил саармагжаад байна. Энэ асуудал бол сүүлийн 10 гаруй жил хийгдсэн нам дамжсан хулгай байна. Нам дамжсан хулгайтай тэмцэхийн тулд нам үл харгалзан нэгдэж байгаад УИХ-аас шахъя.

Ямар дүнтэй хулгайг хэн хийв, Засгийн газарт ямар асуудал байгаа, хулгайтай цаашид яаж тэмцэхийг нээлттэй сонсгол хийе.

Иргэд гадаа жагсаж байгаа. Иргэдийн жагсаал үр дүнтэй байх ёстой. Жагсаалын үр дүнгүй болгохын тулд нүүрсчид өөр чиглэл рүү явуулах, улстөрчид нь өшөө авалтын хэрэгсэл болгож тарамдуулах гээд байна. Ингэж болохгүй. Хуулийн дагуу тодорхой мэдээлэлтэй явъя.

Энэ хулгайг илчлэхгүй бол бусад хулгай илчлэгдэхгүй юм байна. Засгийн газрын бяр хүрэхгүй юм байна. 11 дүгээр сард багтаагаад нууцалсан оффтейк гэрээнүүдийг ил болгоно гэж Эдийн засгийн хөгжлийн сайд Ч.Хүрэлбаатар зарласан ч одоо болтол байхгүй.  Энэ нууц гэрээ ил болж байж хулгайны ард байгаа хүмүүс ил гарна. Магадгүй хэзээ ч нээгдэхгүй байх.

Цаашид ҮАБЗ рүү хандах ёстой юм байна. Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нар ҮАБЗ-өөс дэмжлэг үзүүлж, Засгийн газарт эрхийг нь нээж байж цаашаа явна.

Ерөнхийлөгч асан Х.Баттулга гэдэг хүний шахалтаар тухайн үеийн Ерөнхий сайд У.Хүрэлсүх, УИХ-ын дарга Г.Занданшатар нарын хуралдааны зөвлөмжид үндэслэн бүх гэрээг нууцад оруулсан. Эндээс эхлэх ёстой.

 

У.Хүрэлсүхийг хулгай хийх сэтгэхүйтэй хүн гэж бодохгүй байна. Монгол Улсын Ерөнхийлөгчийн хувьд эр зориг гаргаж, энэ асуудлыг яаралтай ҮАБЗ-өөр хэлэлцээд, оффтейк гэрээнүүдийг ил болгох зөвлөмжийг Засгийн газарт өгөх хэрэгтэй” гэсэн байр суурийг илэрхийллээ.

Мөн тэрбээр нүүрсний хулгайн нийт дүн 40-45 их наяд төгрөг мөн гэдгийг батлав. Энэ талаар "Бид 10 жилийн хугацаанд 250 орчим сая тонн нүүрс экспортолж, уурхайн амны үнээр зарсан. Гэтэл хилийн цаана 60-70 ам.доллараар үнэтэй. Энэ дундаас 15 тэрбум ам.доллар оруулж ирэх боломжоо алдсан. Одоогийн ханшаар 40-45 их наяд төгрөг болно. Үүнийг Ерөнхий сайд Л.Оюун-Эрдэнэ хэлсэн нь үнэн. Эндээс 12-15 их наяд төгрөгийн татвар алдсан, энэ бодитой тоо" гэсэн мэдээллийг Т.Доржханд гишүүн өглөө.

Б.Хэрлэн