Засгийн газраас Аялал жуулчлын хуулийн шинэчилсэн найруулгын төслийг УИХ-д өргөн мэдүүлээд буй. Уг хуулийн төсөлтэй холбогдуулан аялал жуулчлалын үйлчилгээ эрхлэгчдийн төлөөлөл өнөөдөр /2022.12.02/ мэдээлэл хийлээ.

"Тулга номадик трэйлс" компанийн захирал О.Тулга “Бид хуулийг эсэргүүцээгүй. Харин аялал жуулчлалыг авч явж байгаа хувийн хэвшлийг хэт дарамталж, боомилсон зүйл заалтуудыг эсэргүүцэж, өөрчлөхийг шаардаж байна. Ерөнхий сайдын Алсын Хараа-2050 урт хугацааны бодлогыг Аялал жуулчлалын хууль нь татаж унагаах гээд байна.

Гадаадаас чуулган оруулж ирдэг тур операторуудыг боомилсон тусгай зөвшөөрлөө эргэн хараач ээ. Аялал жуулчлалын салбарт тусгай зөвшөөрөл байх ёсгүй. Бид ангиллын гэрчилгээтэй ажиллахад асуудалгүй.

Аялал жуулчлал бол улс төрөөс ангид цэвэр өрсөлдөөний салбар. Энэ байдлыг өөрчилж, төр аялал жуулчлалыг мэдэлдээ авахыг санаархаж байна. Биднийг тусгай зөвшөөрөл гэдэг ташуураар ташуурдах нь. Ингэснээр аялал жуулчлалын салбар авлигад идэгдэнэ. Тусгай зөвшөөрлийн шалгууруудыг давахын тулд олон дарга, байцаагч нарыг хаалга үүдийг сахидаг болно. Аялал жуулчлалыг дэмжинэ гэж ярьчихаад биднийг хуулиар чангалж, боомилох, торгох чиглэл рүү явж байна. Боловсон хүчний асуудал хүндэрч байгаа энэ үед ийм дарамттай салбарт хэн ч ажиллахыг хүсэхгүй” гэсэн байр суурийг илэрхийллээ.

Хуулинд аялал жуулчлалын компаниудын гол бүтээгдэхүүн болох маршрутыг орон нутгийн засаг захиргаа батлах заалт орсон байна. Энэ бол аялал жуулчлалын мэргэжлийн байгууллагуудын хийдэг ажил. Орон нутгийн удирдлага аялал жуулчлалын маршрутыг батлах юм бол хүнд суртал нэмэгдэнэ. Төрийн хүнд суртлыг бууруулж, тусгай зөвшөөрлийг багасгая гэчихээд манай салбарт тусгай зөвшөөрөл нэмж байна. Хувийн хэвшлийг зөвшөөрөлгүй ажлыг нь хийлгээч гэсэн шаардлагыг тэд тавьж байна. 

Аялал жуулчлалын салбар 80 мянган хүнийг ажилтай, орлоготой байлгаж, 600 сая ам.долларыг эдийн засагт оруулдаг байна.

Б.Хэрлэн