УИХ-ын дарга Г.Занданшатар "Согтууруулах ундааны эргэлтэд хяналт тавих, архидан согтуурахтай тэмцэх тухай" хуулийн талаар мэдээлэл хийлээ. 

Тэрбээр "УИХ-аар хэлэлцэн батлагдсан хуулиудын талаар долоо хоногийн мягмар гараг бүр 11 цагаас мэдээлэл хийхээр болсон. Ирэх оны нэгдүгээр сарын 1-ээс  "Согтууруулах ундааны эргэлтэд хяналт тавих, архидан согтуурахтай тэмцэх тухай" хууль хэрэгжиж эхэлнэ. Хуулийн шинэчилсэн зохицуулалтыг танилцуулах гэж байна. 

Монгол Улс архины хэрэглээгээрээ дэлхийд хамгийн өндөр түвшинд байгаа улсуудын нэг. Архины хэрэглээ байнга өсөн нэмэгдэж байна. Нэг хүнд 8,2 литр архи оногдож байна. Архидан согтуурснаас үүдэлтэй зуурдаар нас баралт дэлхийн түвшнээс хоёр дахин их байгаа нь энэ хуулийг шинэчлэх шалтгааны нэг. Энэ хуулийн үзэл санаа нь хэрэглэгчдэд баталгаатай аюулгүй бүтээгдэхүүнийг хүргэх зарчим баримталсан. Хоёрдугаарт хэрэглээний соёлыг төлөвшүүлэх нь чухал.

Согтууруулах ундааны зөв зохистой хэрэглээг нэмэгдүүлэх зорилгоор градусыг нь нэмэгдүүлэх, татвар бууруулах, шахахыг хориглоно. Согтуурсан хүн гэмт хэрэг зөрчил гаргах юм бол архиар шахсан хүн хариуцлага хүлээнэ. /Бусдыг согтууруулах ундаа хэрэглэхийг шаардахыг хориглоно. Бусдыг согтууруулах ундаа хэрэглэхийг шаардаж согтоосны улмаас бусдад учруулсан гэм хорыг согтууруулах ундаа хэрэглэхийг шаардсан этгээдэд хариуцуулна/.  Гуравдугаарт, хүний эрүүл мэндэд хортой хатуулаг өндөртэй архины хэрэглээг багасгах зорилт тавьсан. Архины үйлдвэрлэлийн тусгай зөвшөөрлийг цаашид зөвхөн дуудлага худалдаагаар олгоно. Архины худалдаа үйлчилгээ эрхийг 5 жил, үйлдвэрлэл 10 жилээр олгоно. Хууль зөрчвөл тусгай зөвшөөрлийг хүчингүй болгоно. 21 нас хүрээгүй хүнд согтууруулах ундаа худалдахгүй, үйлчлэхгүй. Энэ хуулийг зөрчвөл үйлчлүүлсэн, үйлчилсэн хоёр нь хоёулаа хариуцлага хүлээнэ. Согтууруулах ундаагаар үйлчилж байгаа газрууд халуун хүйтэн зууштай байх ёстой. Оройн цагаар архи пивоор үйлчилж байгаа газрууд ундны усыг үнэгүй болгох зохицуулалт орсон. Архи согтууруулах ундаа хэтрүүлэн хэрэглэсэн хүнд бар, ресторанууд үйлчилгээ үзүүлэхийг хориглоно " гэлээ. 

П.ГОО