Өнгөрсөн долоо хоногт Засгийн газрын өргөтгөсөн хуралдаанаар дизель түлшний хомстлыг зохицуулах үүргийг УУХҮ-ийн сайдад өгсөн. Бүр тодруулбал, Дизель түлшний нийлүүлэлт буурснаас “Багануур” ХК 3 хоногийн, “Шивээ овоо” ХК 11 хоногийн нөөцтэй байгаа тул УОК-ын дарга, Шадар сайд С.Амарсайхан дизель түлшний нөөцийг яаралтай бүрдүүлж, нийлүүлэлтийг тогтвортой хэмжээнд байлгахыг Уул уурхай, хүнд үйлдвэрийн сайд Ж.Ганбаатарт үүрэг болгосон юм. 

Улс орон даяар дизель түлшний нийлүүлэлт саатсан асуудлаас үүдэн их бага асуудлууд урган гарсаар байна. Гэтэл салбарын сайд Ж.Ганбаатар шинэ мэдээлэлгүй байна. 

Түүний зүгээс  өнөөдөр УУХҮЯ-аас хийсэн хэвлэлийн хурлын үеэр "Өнгөрсөн лхагва гарагт та бүхэнд мэдээлэл өгсөн. Энэ мэдээллийг товчлоод хэлье. Гурван том асуудал байна. Нэгдүгээрт, ОХУ-ын дотоод асуудал. Тус улсын дотоод хэрэглээ өмнө нь байгаагүйгээр нэмэгдсэн. Хоёрдугаарт, Монгол Улсын шатахууны хэрэглээний 60 хувийг Роснефть, 40 хувийг нь бусад трейд компани нийлүүлдэг. Трейд компаниуд нийлүүлэлтээ хязгаарласан. Иймээс 40 хувийг нөхөхөөр Роснефть компанитай гэрээ хэлцэл хийж байна.  Ирэх сараас эхлэн Роснефть 83 мянган тонн хангалт хийхээр гэрээ байгуулсан" хэмээн өнгөрсөн долоо хоногийн мэдээллээ давтав. 

Дизель түлшний нийлүүлэлт буурснаас нийслэл болон аймгууд гал алдахад хүрч, тээвэрлэлт хийдэг ААН-үүд тэг зогсолт хийж эхлээд байна. Нэг үгээр дизель түлшний нийлүүлэлтийн асуудал цаг минутаар хэмжигдэж байна. Гэтэл түлшний нөөцийг яаралтай бүрдүүлэх үүрэг өгөөд байхад УУХҮ-ийн сайд нь долоо хоногийн өмнөх мэдээллээ тоть шиг давтаж байгаа нь харамсалтай.  

П.ГОО