Ж.Сүхбаатар сайд эрс хүйтэрсэн өдрүүдэд сургууль, цэцэрлэгийг ЦАХИМААР хичээллүүлэх санал гаргажээ. Үүнийг нь хотын дарга дэмжсэн байх. 

Монгол Улсын Засгийн газрын кабинетад БШУ-ны сайд гэх тусгайлсан албан тушаал албан тушаал бий. Гэтэл Монгол Улсын сайд, Түгжрэлийг бууруулах үндэсний хорооны даргын түгжрэл шийдэхээр боловсруулсан санаа нь л даа. Гэтэл үүнийг нь хотын дарга дэмжиж байна. Сайхан холбон тоглолт.

Гэхдээ Монгол Улсын боловсролын асуудлыг тэр дундаа сурагчдын хичээл сургуулийн үргэлжлэх хугацаа, амрах товыг салбар яам нь хариуцан шийддэг байвал ямар вэ?  Дарга сэтэртэй бүхэн нь салбарын асуудлаа шийдэхийн тулд бүр тодруулан хэлбэл түгжрэл бууруулахын тулд сургууль цэцэрлэгийн сургалтын үйл ажиллагааг цахим болгох гэм мэт шийдвэр гаргах зүй ёсных уу? Бороо цас орж, замын ачаалал ихсэх бүрт сургууль цэцэрлэгийг цахим хэлбэрт шилжүүлээд байвал МОНГОЛ УЛСЫН боловсролын салбарт төгсгөл ирэх биш үү? Өнгөрсөн хоёр жил цар тахлаас үүдэн сурагчид хангалттай сургалтын хоцрогдолд орсон. Гэтэл одоо замын түгжрэлээ зохицуулж чадахгүй дарга нар боловсролын салбарын үйл ажиллагааг тасалдуулж, хүүхдийн сурах эрхэнд халдаж байгаа нь хэр зохистой үйлдэл вэ? 

Тэгвэл салбар яамны байр суурийг үл тоон том толгойлсон дарга нарын саналтай санал нийлэхгүй байгаа Л.Энх-Амгалан сайд хэвлэлд "Ерөнхий боловсролын сургуулийн нэгдүгээр улирлын хичээл ирэх сарын 16-ны баасан гарагт хичээллэснээр дуусгавар болно. Нэгдүгээр улирлын амралт зургаан 7 хоногийн турш үргэлжилнэ. Амралт тун удахгүй эхлэх гэж байгаа учраас ирэх долоо хоногт цаг агаар хүйтрэх, үүнээс үүдэлтэй түгжрэл нэмэгдэх зэрэг шалтгааны улмаас хичээл сургалтын үйл ажиллагааг зогсоох боломжгүй юм. Цар тахлын нөхцөл байдлын үед сургуулиуд хангалттай урт хугацаанд үйл ажиллагаагаа зогсоосон. Зайн сургалт нь танхимын хичээлийг нөхөхүйц үр дүнтэй байж чадаагүй. Тиймээс аль болох сургууль хаах, хичээлийг зогсоох шийдвэрээс татгалзана" хэмээн мэдэгджээ. 

П.ГОО