Улаанбаатар хотын автозамын түгжрэл өдрөөс өдөрт нэмэгдэж байна.  Оргил ачааллын үед автомашин явган хүний алхах хурдтай адил хурдаар замын хөдөлгөөн оролцож байгаа судалгаа гарчээ. Аль хэдийн ачааллаа дийлэхээ болсон Улаанбаатар хотынхон энэ асуудлыг хэрхэн шийдэх шийдэл, гарцыг  олоогүй л түгжирч явна. 

Анх 600 мянган хүн оршин суухаар төлөвлөгдсөн ч өнөөдөр нийслэлийн 458 мянган га нутаг дэвсгэрт 1.6 сая хүн амьдарч, 665 мянга орчим тээврийн хэрэгсэл замын хөдөлгөөнд оролцож байна. Мөн тээврийн хэрэгсэл жилд 70.000-80.000-аар нэмэгдэж байгаа.  Хүн амын хэт их нягтаршлаас үүдэн нийслэл хот стресстэй, агаар, хөрсний бохирдолтой, автозамын түгжрэл их. Иймээс түгжрэлийг бууруулах гарц, шийдэлийг олохоор тусгайлсан яам хүртэл байгуулав. Одоогоор тус яамнаас түгжрэлийг бууруулах чиглэлээр хэрэгжүүлбэл зохих 300 гаруй ажлыг 36 багц болгон, үүнээс 2022 онд 12 багцын 49 төсөл, арга хэмжээг хэрэгжүүлэхээр төлөвлөжээ.

Ингэхдээ сургууль, цэцэрлэгийн хүртээмжийг нэмэгдүүлэх, нийтийн тээврийг шинэчлэх, газар чөлөөлөх, шинээр гол болон туслах авто зам, замын байгууламж барих, Яармаг дэд төв байгуулах,  явган хүний болон дугуйн замыг шинэчлэх, гарааш болон хашаа, хайс буулгах, уулзварыг дахин инженерчлэх зэрэг ажлуудыг багтаажээ. Мэдээж олон жилийн хур асуудал болсон түгжрэлийг бууруулах гэдэг бол маш олон ажлуудын нийлбэр цогцоор шийдэгдэх ёстой, маргахгүй.

Гэхдээ дээрх асуудлыг шийдлээ өргөс авахтай адил үр дүнг хүлээх хэрэггүй юм. Үүнийг ч хотын дарга хүлээн зөвшөөрч ТҮГЖРЭЛД БУУЖ ӨГЧ байгаагаа мэдэгдлээ. Хотын дарга Д.Сумъяабазар өчигдөр хэвлэлийнхэнд мэдээлэл өгөх үеэр "Би ч гэсэн түгжрээд явж байна. Заримдаа яах аргагүй засгийн хуралд амжихгүй маяакаа асаагаад явдаг. Үнэнээ хэлье. Заримдаа машин дотор түгжрээд сууж байхаар алхаад явчихдаг. Ойрхон зайд бол алхах нь амар. Энэ түгжрэлийн асуудлыг илбийн юм шиг өнөө маргаашгүй шийдэж чадахгүй шүү дээ. 10 жил хэрэгтэй” гэлээ. 

Нэг үгээр ойрын жилүүдэд түгжрэл буурна гэж найдалтгүй гэдгийг тэр хэлээ. Ийнхүү эрх баригчид урт хугацаандаа  LRT, хурдны зам, метро мэтээр аргацааж, буруу хүрдтэй машиныг тодорхой он заана  мэт үлгэр домгуудаа ярьж, хуурсаар дахин 10 жилийг барахаар шийдсэн бололтой юм. Ямартай ч хотын дарга үнэнээ хэлэн түгжрэлд "75"-аар бууж өглөө.

П.ГОО