Сүүлийн үед энгийн, эгэл жирийн, элдэв нэмэлт хачиргүй байх тухай их ярих болжээ. Монгол хэлний тайлбар толинд ЭНГИЙН гэдэг үгийн утгыг “эгэл жирийн, онцын юмгүй, ердийн” хэмээн тайлжээ. 

Тэгвэл эгэл жирийн, ялгаатай байдлыг хэн хэрхэн үүсгэж байна вэ?

Өдөр бүр их хотын иргэдийн бухимдлыг төрүүлдэг зүйл бол замын түгжрэл. Үүн дээр нэмэгдээд төрийн өндөр албан тушаалтнуудын хэтэрсэн эрх ямба. Их хотын завгүй амьдрал дунд яарч сандарсан ч эрхтэн дархнууд замын хөдөлгөөнд оролцож байгаа үед иргэн таны асуудал хамаагүй. Тэд эрх ямбатай учраас иргэн таны алтан цагаас хумслан, эгнээ эгнээгээр зам хаалгаж дуут дохио хангинуулан давхиж өнгөрнө. Тэд ажилтай, тэд яардаг. Тэгвэл тэд яагаад энгийн иргэд дундаа орж түгжирч болдоггүй вэ? 

Өнгөрсөн долоо хоногт Ерөнхий сайд автобусаар “аялж” буй үйл явдал олон нийтийн шүүмжлэлийг дагуулав. Шинэ хувцасаа өмсөж ширээний бүтээлгээ сольсон орчноос Ерөнхий сайд шийдэл хайж байгаа нь энэ л дээ. Яагаад Ерөнхий сайд тусгайлан бэлдэж угаасан, жолооч нь Ерөнхий сайдад зориулж цагаан цамцаар гоёосон автобуснаас шийдэл хайж явааг харсан хүн бүхэн ийн бухимдаж байна. Ерөнхий сайд та, энгийн ажлын өдрөө иргэдтэйгээ хамт автобусанд суугаад эхлүүлэхэд ичгэвтэр үү, эсвэл энгийн байх нь танд тохирохгүй зүйл үү?

Хоёр хоногийн өмнө Чингисийн хөшөө нээлт мөн л шүүмжлэл дагуулав. Энэ үеэр төрийн өндөр албан тушаалтнууд тусгайлан бэлдсэн сандалд тухалсан бол жирийн иргэд улаан уяаны цаанаас музейн нээлтийг үзэж сонирхов. Уг нь Ерөнхийлөгчийн дэргэд энгийн нэгэн ээж суугаад музейн нээлт үзэж болох шүү дээ. Яагаад заавал алба хашдаг нь ард түмний хайр хүндлэлээр олны танил болсон хүмүүс нь сандалд тухлаад жирийн иргэд нь улаан уяаны гадна зогсох ёстой вэ? Эсвэл заавал Хаад ноёд нь сэнтийд заларч, ард түмэн нь хатавчинд суух ёстой юу?

П.ГОО