УИХ-ын гишүүн С.Чинзориг нарын гишүүд Төрийн албаны тухай хуульд нэмэлт өөрчлөлт оруулах хуулийн төслийг УИХ-д өргөн мэдүүллээ.

Энэ талаар УИХ-ын гишүүн С.Чинзориг “Сумын ЗДТГ-т ажиллаж байгаа төрийн захиргааны жинхэнэ албан хаагчдын цалинг нэмэгдүүлж, нийгмийн баталгааг сайжруулахтай холбоотой харилцааг зохицуулахаар хуулийн төсөлд тусгалаа.

Одоо сумын ЗДТГ-т ажиллаж байгаа албан хаагчдын үндсэн цалин 615 000 төгрөг байна. Цалин бага учраас тэнд ажиллаж байгаа төрийн албан хаагч төрийн үйлчилгээг чанартай, хүртээмжтэй хүргэх бололцоо, нөхцөлгүй. Цалин хөлс хангалтгүй байгаа учраас шилжилт хөдөлгөөн ихтэй байна. Төрийн албаны зөвлөлөөс авсан судалгаагаар сумдын ЗДТГ-т ажиллаж байгаа 1300 гаруй төрийн албан хаагч өөрсдийн хүсэлтээр өөр ажилд шилжиж, ажлаас чөлөөлөгдсөн байна. Одоогоор сумдын ЗДТГ-т 1809 сул орон тоо байгаа ч цалин хөлс бага, нийгмийн хамгаалал сайнгүй шалтгаанаар мэргэжилтэй боловсон хүчин очихгүй байна.

Тиймээс Төрийн албаны тухай хуульд өөрчлөлт оруулж, сумдын ЗДТГ-т ажиллаж байгаа төрийн албан хаагчдад 5 жилд нэг удаа зургаан сарынх нь цалинтай тэнцэх хэмжээний мөнгөн тэтгэмж олгохоор тусгаж, УИХ-ын даргад өргөн барилаа.

Энэ хууль батлагдсанаар орон нутгийн төрийн албан хаагчдын цалин хөлс, нийгмийн баталгаа дээшилж, тогтвор суурьшилтай ажиллана” хэмээн үзэж байгаагаа илэрхийллээ.

Б.Хэрлэн