Монголд орж ирсэн ОХУ-ын иргэн Монгол иргэний толгойг алхаар цохиж, хүнд гэмтээсэн хэрэг гарсан талаар цахим орчинд  тархаад байсан. Тэгвэл уг орос иргэнийг хойшлуулшгүйгээр баривчилж, цагдан хорих 461-р ангид хорьсон талаар цагдаагийн байгууллагаас мэдээллэсэн. Мөн  зодуулж, эмнэлэгт хүргэгдсэн монгол иргэний бие тааруу байгааг ар гэрийнхэн нь мэдээллээд байсан. 

Өнөөдөр буюу есдүгээр сарын 26-нд ОХУ-ын иргэн Монгол залуугийн толгойг алхаар цохиж хүнд гэмтэл учруулсан хэрэгтэй холбоотойгоор Хэргийн талаар ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү дараах мэдээлэл өглөө. 

"Энэ сарын 22-23нд ОХУ-аас Д нь Монгол Улсад ирсэн. Ирэхдээ хил дээр  Б гэгч залуутай танилцаж түүний байрыг түрээслэхээр есдүгээр сарын 24-ны өдөр тухайн байршилдаа очсон. 

Тухайн Монгол иргэний байрны танил болох хүмүүс Б-ийн гэрт орсон. Уг байршилд 4 хүн байснаас. Гурван Монгол, нэг ОХУ-ын иргэн байжээ. 

Мөрдөн шалгах ажиллагаа хийгдсээр байна. Зарим хэвлэл мэдээллийн хэрэгслээр ОХУ-ын Элчин сайдаас асууна гэх ташаа мэдээлэл гарсан байна. Тухайн иргэн ямар нэгэн дипломат эрх ямба байхгүй. Уг иргэнийг саатуулах үйл ажиллагаа оройтсоныг хүмүүс буруугаар ойлгосон байх. 

ОХУ-ын иргэн Д-г шүүгчийн зөвшөөрөлгүй 48 цагийн саатуулах арга хэмжээг авсан. Мөн тухайн нөхцөлд байсан хоёр Монгол иргэнийг мөн саатуулсан. Гэмт хэрэг үйлдэх болсон шалтгаан, нөхцөл нь мөрдөн шалгах ажиллагааны дараагаар тодорхой болно" гэлээ.