Маргаантай арал дээр явагдаж буй цэргийн сургуульд оролцсоноос болж, Монгол-Японы харилцаанд сэв сууж буй талаар олон нийтийн сүлжээнд цацагдаад буй. Тэгвэл  энэ мэдээллийг Гадаад харилцааны болон Батлан хамгаалахын сайд үгүйсгэлээ.

Батлан хамгаалахын сайд Г.Сайханбаяр “Монгол Улсын Батлан хамгаалах яам 40-өөд оронтой цэргийн дипломат харилцаатай ажилладаг. Батлан хамгаалах яам цэргийн дипломат ажиллагааны талаар нэгдсэн бодлого, төлөвлөгөөтэйгээр үйл ажиллагаа явуулдаг.

Манай улс 10-аад оронтой цэргийн хамтарсан сургуулийг зохион байгуулдаг. 2022 онд АНУ-тай долоо, ОХУ-тай хоёр удаагийн хамтарсан сургуулийг зохион байгуулсан. Герман, Турк, Япон зэрэг улстай хамтарсан сургууль явуулдаг. Мөн энхийг сахиулах ажиллагааны сургуулиудад Монгол Улс оролцож байна. Энэ сургуулиудад оролцох нь батлан хамгаалах гадаад харилцааг өргөжүүлэх, улс төр, дипломат аргаар аюулгүй байдлаа хангах чиглэлийн үйл ажиллагаагаа эрчимжүүлж, хамтын ажиллагааг хангах зорилготой” гэдгийг тайлбарлалаа.

Мөн Батлан хамгаалахын сайд цэргийн хамтын ажиллагааны талаар дүгнэлт хийж, болчимгүй үг яриа гаргахгүй байхыг анхаарууллаа.