Наймдугаар сарын 27-ноос эхлэн Тэг зогсолт хийх эрсдэлтэй болсон гэж үзэн хичээлийн шинэ жил эхэлж буйтай холбоотойгоор долоо хоногийн турш авто машины улсын дугаарыг тэгш, сондгойгоор нь ээлжлэн хөдөлгөөнд оролцуулж, хязгаарлах шийдвэрийг гаргасан.

Иргэд  цаашид автомашинуудыг улсын дугаарын тэгш, сондгойгоор ангилан, хөдөлгөөнд оролцуулах боломжийн талаар байр сууриа илэрхийллээ.

Иргэн Э.Мөнхболд

-Автомашиныг цаашид тэгш сондгойгоор явахыг дэмжиж байна уу?

-Нэг газраа таг зогсоод бүтээсэн ч юмгүй буцаад харьж байхын оронд нэг өдөр машинаа уначхаад, нэг өдөр нь алхаад ч юм уу автобусанд суучихад зүгээр юм байна. Цаашдаа тэгш сондгойгоор явуулахыг хувьдаа дэмжиж байна.

-Автобусний хүрэлцээ хэр харагдаж байна вэ?

-Автобусны хүрэлцээ зарим чиглэлд их бага ирдэг. Үүнээс болж хүлээх тохиолдол их байдаг. Ажил тарах үеэр маш их хүнтэй байдаг болохоор арай чүү гэж багтаж явдаг.

-Машин явахгүй өдөр ажлаа хэрхэн зохицуулж байгаа вэ?

-Миний хувьд өдрийн цагаар машин барих шаардлага байдаггүй. Тийм болохоор машин явдаг өдрөө машинаа унаж, явдаггүй өдөр нь нийтийн тээврээр зорчиж байна.

Иргэн М.Алтантуяа

-Автомашиныг цаашид тэгш сондгойгоор явахыг дэмжиж байна уу?

-Энэ өдрүүдэд автомашины хөдөлгөөн урьд урьдын жилээс хавь илүү байлаа. Түгжрэлийг бууруулах гэж байгаа бол тэгш боломж, тэгш өөрчлөлтийг бүгдэд нь ижил олгох ёстой. Цаашид хөдөлгөөний эрчмийг бууруулах гэж байгаа бол гол замуудынхаа ядаж 30 хувийг дугуйн зам болгож хувиргавал зүгээр санагдаж байна.

-Автобусны хүрэлцээ хэр харагдаж байна вэ?

-Автобусны тоог нэмээд өгвөл их зүгээр юм шиг санагдсан. Зарим чиглэл нь өглөө ажил эхлэх үе, орой ажил тарах үеэр багталцахгүй хэцүү харагддаг.

-Машин явахгүй өдөр ажлаа хэрхэн зохицуулж байгаа вэ?

-Машин явахгүй өдөр унадаг дугуй унаад явчихдаг. Гэхдээ манай улсад гадуур дугуйтай явах нь их бэрхшээлтэй байдаг. Учир нь хангаллтай хэмжээнд дугуйны зам байдаггй учраас хажуугаар өнгөрөх хүнийг шүргэх эсвэл зориулалтын буё замаар явдаг болохоор бэртэх тохиолдол хэд хэдэн удаа тулгарч байсан.

Иргэн н.Саруул 

-Автомашиныг цаашид тэгш сондгойгоор явахыг дэмжиж байна уу?

-Нэг талаараа машин явахгүй нь хэцүү байна. Хүүхдээ хүргэж өгье гэхээр машингүй дуудлагын такси дуудахаас өөр сонголт байгаагүй. Нөгөө талаараа хотын гудамж сэлүүхэн байна. Богино хугацаанд бол үр дүнтэй шийдвэр байлаа. Үнэхээр цаашид яригдах асуудал гарвал дэмжих хүн бараг л байхгүй. 

-Автобусний хүрэлцээ хэр харагдаж байна вэ?

-Би хоёр хүүхэдтэй. Коронавирусын халдвар буцаад ихсэх магадлалтай байгаа учраас хүүхдүүдийнхээ эрүүл мэндийн төлөө автобусаар зорчихгүй байгаа. Хөдөлгөөнд оролцоход ямар ч түгжрэлгүй хэд хоног бол сайхан байлаа. Хүйтний улирал дөхөж байгаа учраас автобусныхаа тоог чиглэл болгон руу нэмээд өгчихвөл хүйтэнд хүмүүс даараад зогсох нь багасах байх.  

Нийслэлийн Засаг даргын тамгын газрын хэвлэлийн төлөөлөгч Н.Сугар

Тэгш сондгойгоор хөдөлгөөнд оролцуулах зохицуулалтыг үргэлжлүүлэх тухай санал иргэдээс ирж байгаа. Гэхдээ үүнийг шийдэхийн тулд эхлээд 8 хоногт ямар үр дүн гарсныг тооцоо судалгаагаар гаргана. Дараа нь олон нийтээс санал асууж байж НИТХ-руу санал оруулах эсэхийг шийднэ хэмээн хэлсэн юм.  

Ц.Наранцацрал