Өчигдөр буюу долоодугаар сарын 25-ний өдөр Баянзүрх дүүргийн 11-р хороо, Хар усан тохой Туул голд хүүхдүүд боогдсон хэрэг гарчээ.

Тодруулбал 5-13 насны долоон хүүхэд голын салаанд усанд боогдож, урсах эрсдэлтэй байжээ. НОБГ-ын алба хаагчид аврах ажиллагааг шуурхай зохион байгуулан аюулгүй байдлыг хангаж, ар гэрийнхэнд нь хүлээлгэн өгч ажилласан байна.

Нийслэлийн хэмжээнд 2022 оны 07 сарын 20-ний байдлаар бага насны хүүхдийн аюулгүй байдлыг хангаагүйн улмаас голын усанд осолдож 6 хүүхэд амь насаа алджээ.

Иймд эцэг эх, асран хамгаалагчид хараа хяналтаа сайжруулж, голын эрэг дагуу бага насны хүүхдийг тоглуулахгүй байх, байнгын анхаарал, сонор сэрэмжтэй байх, цаг агаарын мэдээллийг тухай бүр хүлээн авч гэнэтийн хүчтэй аадар бороо, аянга цахилгаан, үер усны аюулаас урьдчилан сэргийлж аюулгүй байдлаа хангахыг Нийслэлийн Онцгой байдлын газраас сэрэмжлүүлж байна.