Үндэсний статистикийн хорооноос Монгол Улсын нийгэм, эдийн засгийн 2022 оны эхний хагас жилийн үзүүлэлтийг танилцууллаа. Монгол Улс 2022 оны эхний хагас жилд дэлхийн 145 улстай гадаад худалдаа хийсэн байна. Гадаад худалдааны тэнцэл урьдчилсан гүйцэтгэлээр эхний хагас жилд 1.4 тэрбум ам.долларын ашигтай гарсан байна. Өмнөх оны мөн үетэй харьцуулахад гадаад худалдааны тэнцэл 535 сая ам.доллароор буюу 65 хувиар өссөн байна.

Гадаад худалдааны нийт бараа эргэлт 9.3 тэрбум ам.доллар байна. Үүнээс экспорт 5.3 тэрбум ам.доллар, импорт 3.9 тэрбум ам.доллар байна.

Эхний хагас жилд экспорт 30 хувиар өсөхөд уул уурхайн бүтээгдэхүүн тэр дундаа нүүрсний экспорт 1.3 тэрбум ам.доллар буюу 2.3 дахин, алтны экспорт 296 сая ам.доллар буюу 2.4 дахин, зэсийн баяжмал 278 сая ам.доллар буюу 21 хувиар өссөн нь гол нөлөө үзүүлжээ.  

Харин импорт өмнөх оноос 687 сая ам.доллар буюу 21 хувиар өсөхөд автобиензин, дизелимйн түлш, суудлын автомашины импорт өссөн нь нөлөөлжээ.