Дорноговь аймгийн Улаанбадрах сумын иргэдийн төлөөлөл хэвлэлийн хурал хийлээ. Тэд Бадрах Энержи компанийн үйл ажиллагаанаас үүдэн Улаанбадрах сумын ус уранаар бохирдож, иргэдийн эрүүл мэнд, амь насанд заналхийлж байгаа талаар мэдээллээ. Тиймээс Бадрах Энержи компанийн үйл ажиллагааг нэн яаралтай зогсоохыг Засгийн газраас шаардав.

Ерөнхий сайд Л.Оюун-Эрдэнэ ЗГХЭГ-ын даргаар ажиллаж байхдаа 2020 оны 05 дугаар сарын 28-нд тушаал гаргаж, Бадрах Энержи компанийн ойр орчмын гүний болон хөрсний усанд шинжилгээ хийлгээд нэр бүхэн найман байршлын уснаас хүн, мал уувал үхлийн аюулд хүргэхийг тогтоосон байдаг. Уран, хүнцэл, хүнд металын цацраг зөвшөөрөгдөх хэмжээнээс 22-92 дахин их байгаа нь тогтоогдсон. Гэтэл хоёр жил өнгөрөөд байхад Засгийн газар ямар ч арга хэмжээ авсангүй. Хүн мал, амьтан ургамал маш их хохирч байна.

Цэвүү-1, 2 гэдэг усанд 2020 онд хэмжилт хийхэд хатуулгийн хэмжээ 6.75 байсан бол 2022 онд хийхэд 8.53 гарсан. Хатуулгын зөвшөөрөгдөх хэмжээ 3 байдаг. Хатуулгын хэмжээ жил жилээр нэмэгдсээр байна.

Улаанбадрах сумын төвийн иргэдийн Болор 1, 2 уснаас ураны агууламж гурав дахин их гарсан. Бид ийм усыг хэрэглэж, үхсээр л байна. Бадрах Энержи компанитай холбоотой усны асуудал Улаанбадрах суманд гамшгийн хэмжээнд хүрлээ. Ерөнхийлөгч болон Ерөнхий сайд Улаанбадрах сумын 1500 иргэн, 100 гаруй мянган малыг хөсөр хаяж байна” хэмээн ярилаа.

Арева компани 2001 оны 07 дугаар сарын 11-ний өдөр хайгуулын зөвшөөрөл авч, үйлдвэрийн туршилтаа өнгөрсөн жилээс эхэлсэн. Ковидын хөл хорионы үеэр үйл ажиллагаа нь маш их идэвхжсэнийг тэд хэлж байна.