Засгийн газраас 2022-2023 оны шинэ хичээлийн жилд бага насны хүүхдүүдийг сугалаагүйгээр цэцэрлэгт хамруулах таван шийдлийг хэрэгжүүлэхээр төлөвлөж, эхний ажлаа эхэллээ.

Нийслэлд 2-5 насны 141 000 хүүхэд байна. Нийслэлийн 647 цэцэрлэг 104 000 хүүхэд авах хүчин чадалтай бөгөөд 34 485 хүүхэд сугалаагаар цэцэрлэгт азаа үзэх эрсдэл үүсэж байна. Тиймээс тэднийг цэцэрлэгт хамруулах дараах таван шийдлийг хэрэгжүүлэхээр Засгийн газрын шийдвэр гарсан юм. 

1. Улс, нийслэлийн төсвийн хөрөнгөөр баригдсан 20 цэцэрлэг энэ жил ашиглалтад орно. Энэ 20 цэцэрлэгт 3000 хүүхэд авах боломжтой.

2. Цэцэрлэгийн зориулалтаар байр түрээсэлнэ. Нийслэлийн хамгийн өндөр ачаалалтай 26 байршилд байр түрээслэхээр нээлттэй сонгон шалгаруулалтыг ирэх долоо хоногоос эхэлнэ.

3. Орон сууцны нэгдүгээр давхруудыг худалдаж авч, цэцэрлэг байгуулна.

4. Гэр цэцэрлэгүүдийг ашиглана.

5. Байгууллагуудын цэцэрлэгийг хувьсах зардлаар дэмжинэ. Одоогоор 21 байгууллагын цэцэрлэгт 1700 хүүхэд суралцаж байна.

Үүнээс цэцэрлэгийн зориулалтаар түрээслэх байрны саналыг өнөөдрөөс хүлээн авч эхэллээ. Баянгол, Баянзүрх, Налайх, Сонгинохайрхан, Сүхбаатар, Хан-Уул, Чингэлтэй дүүргийн нийт 71 хороонд цэцэрлэгийн зориулалтаар байр түрээсэлнэ. 

Саналыг цахимаар 2022 оны 7 дугаар сарын 01 хүртэл хүлээн авах аж.