Махны холбооноос үйл ажиллагааны талаар мэдээлэл хийлээ.

Махны холбооны төлөөлөл “Сүүлийн өдрүүдэд махыг химийн бодистой хольсон асуудал гаргаад байгаа үйлдвэр Монголын махны холбоонд хамааралгүй. Монголын махны холбоо ард иргэдийг эрүүл, аюулгүй хүнсээр хангах зорилготой ажилладаг байгууллага. Монголын махны холбоо мах, махан бүтээгдэхүүний 67 үйлдвэр, аж ахуйн нэгжүүдийг нэгтгэсэн байгууллага. Мах боловсруулдаг дулааны үйлдвэр, мал төхөөрөх үйлдвэрүүд ч мөн махны холбоонд хамааралтай, уялдаа холбоотой ажилладаг.

Сүүлийн өдрүүдэд махыг химийн бодистой хольсон асуудал гаргаад байгаа үйлдвэр Монголын махны холбоонд хамааралгүй үйлдвэр гэдгийг мэдэгдэх нь зүйтэй. Манай холбоонд нэгдэлтэй мах, махан бүтээгдэхүүн үйлдвэрлэдэг үйлдвэрүүдийн хувьд долоо хоног бүр бүтээгдэхүүнийхээ дээжийг мэргэжлийн лаборатори шалгуулж, шинжилгээ хийлгэдэг. Мөн мэргэжлийн хяналт, Мал эмнэлгийн ерөнхий газраас тогтмол шалгалт хийснээр үйл ажиллагаагаа явуулж иргэдийг эрүүл хүнсээр хангадаг.

Экспортын үйлдвэрүүдийг шалгаруулахдаа тухайн орны шинжээчид тусгай группээр ирж нэг бүрчлэн нарийн судалсны үндсэн дээр хамтарч ажилладаг. Тиймээс манай орны төр засаг, хэн нэгэн эрх мэдэлтний шийдвэрээр нэр цохож импортлох боломжгүй. Зөвхөн тухайн импортлогч орны шийдвэрээс хамаардаг” гэж мэдэгдлээ.

Б.Намуунзаяа