"Бурхан болоочдыг хөдөөлүүлдэг газрыг цэцэрлэгт хүрээлэн болгохдоо эрдэм мэдлэг бүрэн эзэмшсэн лам, үзмэрчээс зөвлөгөө авч, санаа бодлыг нь сонсож байж шийдвэр гаргах шаардлагатай. Аль нэг газрын даргын шийдвэрээр шийдэх нь буруу" гэж Монголын бурхан шашны шинэ төвийн тэргүүн З.Санждорж хэвлэлийн хурал хийж мэдэгдлээ.

Тэрбээр "Шарил, булшийг энгийн хог хаягдал шиг ухаж сэндийчих нь хойшдоо муу үр дагавартай. Хүн хөдөөлүүлэхэд цээрлэх зүйлс олон буй. Мөн бурхан болоочийн шарил бунханыг ухаж сэндийчиж үл болох цээр ч бий. Би 70 давхарын оршуулгын газарт очиж нүдээр үзсэн, байдал тийм ч муу болоогүй. Байгалиараа нурж унасан цогцос тун ховор, бүгд доторх төмөр, үнэд хүрэх зүйлсийг авах зорилгоор ухсан нь илт байсан.

Магадгүй энэ нь өөрсдийн санаа бодлыг гүйцэлдүүлэхийн тулд муу муухай харагдуулахын тулд зохион байгуулалттайгаар хийсэн байж магадгүй. Үнэхээр орчинг сайжруулах чин хүсэлтэй бол газрыг ухаж сэндийчихгүйгээр Ерөнхийлөгчийн санаачилгын дагуу мод тарих хэрэгтэй" гэж үзэж буйгаа ярилаа. 

Б.Намуун