Засгийн газраас QSC компанийн концессын гэрээг хүчингүй болгосонтой холбогдуулан тус компанийн зүгээс тайлбар хийж байна.

"QSC" компанийн гүйцэтгэх захирал Э.Шижир “Эдийн засагт ач холбогдол бүхий төслийг хэрэгжүүлж эхэлсэн. Бидэнд 2013 оноос хойш хоёр зорилго байсан.

Төмрийн хүдрийн орд газруудыг эдийн засгийн эргэлтэд оруулах гэсэн төсөл байсан. Уг төслийн хүрээнд хийгдэх ёстой ажлууд, түүнд шаардлагатай дэд бүтцийн төслүүд гэрээний хүрээнд бидэнд эрхийг нь олгосон. Үүнд хамгийн томоохон орд газар нь Төмөртэйн орд. Стратегийн орд. Уг ордыг эдийн засгийн эргэлтэд оруулах шаардлагатай дэд бүтэц болох төмөр зам, авто зам болон цахилгаан дамжуулах агаарын шугамыг бүтээн байгуулалтын ажлуудыг гэрээний хүрээнд QSC компанид хийж хэрэгжүүлэх эрхийг нь олгосон байсан. Мөн орд газруудыг эдийн засгийн эргэлтэд оруулахын тулд олборлох хүчин чадлыг бий болгох, техник эдийн засгийн үндэслэлийг батлуулах, шаардлагатай баяжуулах үйлдвэрүүдийг барьж байгуулах гэсэн өргөн цар хүрээний төслүүд хамрагдаж байсан.

...Гэтэл уг төсөлд шаардлагатай цахилгаан эрчим хүчний эх үүсвэрийн зэрэгцэж явж байсан төслүүд зогсонги байдалд орж, төсөл технологийн шугамаар цаашид явах боломжгүй болсон нөхцөл байдал үүссэн. Энэ нь өнөөдрийн та бүхний хэрэглэж байгаа цахилгаан эрчим хүчний үйлдвэрлэж байгаа эх үүсвэрийн  18-20 хувьтай тэнцэх хэмжээний нэмэлт цахилгааны эрчим хүчний үүсвэр шаардлагатай. Энэ нь шаардлагатай дэд бүтцийн асуудал хэрэгжихэд хүндрэлтэй болсон учраас 2018,2019 оноос эхлүүлэн бага цахилгаан эрчим хүчний шаардлагатай өөр технологийг хэрэглэж, гангийн үйлдвэрлэл явуулах судалгаа шинжилгээний ажлыг эхлүүлээд явсан. Энэ үед цар тахлын нөлөө бүхий хүнд нөхцөл байдалд судалгаа шинжилгээний ажил хийж, 2021 оны есдүгээр сард техник эдийн засгийн үндэслэлийг мэргэжлийн зохих эрх бүхий байгууллагаар батлуулж, ажил эрчимтэй хэрэгжих нөхцөл байдлыг бүрдүүлсэн. Гэхдээ энэ технологийн дамжлагаар явахад нэмэлт 70 мВт цахилгааны эх үүсвэр шаардлагатай хэвээр байгаа. Энэ асуудлыг бид бодитой үнэлж, цаашид энэхүү төслийг хэрхэн хэрэгжүүлэх вэ гэдэгт үнэлэлт дүгнэлт өгөх, цахилгаан эх үүсвэрийн асуудлыг хэрхэн шийдвэрлэх вэ гэдэгт харилцан ярилцаж, бодит байдлыг үнэлж, дүгнэх шаардлагатай гэж үзэж байна.

Бидний зүгээс анх хөрөнгө оруулалтын гэрээ байгуулагдсанаас хойш 12 жил, концессын гэрээний хэлбэрт шилжиж ажиллаж эхэлснээс хойш 8 жилийн хугацаанд Монгол улсынхаа ган үйлдвэрлэгч болох төсөл зорилгодоо үнэнч хэвээр, төслийнхөө ард гарна гэсэн чин хүсэлтэйгээр ажиллаж эхэлсэн. Одоо ч хүсэл эрмэлзэл маань унтраагүй байна.

Засгийн газрын хуралдаанаар бидэнд урьдчилж мэдэгдэлгүйгээр шийдвэр гаргасан. Гэхдээ төр засгийнхаа гаргасан шийдвэр, олон нийтийн зүгээс гангийн үйлдвэрийг хүссэн, хүсэмжилсэн хүслийг хүндэтгэн, төслийг яаравчлуулах шаардлагатай гэсэн шаардлагыг хүлээн авч, тодорхой шалтгаанууд байгаа хэдий ч цаг хугацаа алдаж байгаа нь та бидний үнэн юм. Тиймээс төсөл хэрэгжүүлэгч компанийн зүгээс төр засаг болон олон нийтээсээ хүлцэл өчиж байгааг минь хүлээн авна уу. Гэрээний хүрээнд үүссэн нэг талын шийдвэрээр цуцалсан энэ нөхцөл байдалд гэрээнд тусгагдсаны дагуу цаашид эв зүйгээр асуудлыг харилцан ярилцаж, үйлдвэрлэл явуулахад шаардлагатай байгаа нөхцөл байдал, дэд бүтэц, эрчим хүчний асуудлыг хэрхэн шийдвэрлэх зэргийг хоёр талаас ажлын хэсэг байгуулан харилцан хамтарч, үнэлэлт дүгнэлт өгч, шийдвэрлэх хүсэлтэй байгаагаа илэрхийлж байна” гэж мэдээллээ.

М.Насан