УИХ-ын чуулганы нэгдсэн хуралдаан эхэллээ. Хуралдааны эхэнд хэлэлцэх асуудлын талаар УИХ-ын гишүүн Н.Алтанхуяг, Б.Пүрэвдорж нар үг хэллээ.

УИХ-ын гишүүн Н.Алтанхуяг: Ерөнхий сайд, сайд нартайгаа УИХ дээр цаг үеийн асуудлаар мэдээлэл хиймээр байна. Бараа бүтээгдэхүүний үнийн өсөлт, тээвэр, хаврын бүтээн байгуулалт, долларын ханшийн талаар УИХ дээр сонсож, иргэдэд баримжаа өгмөөр байна. Ард түмний амьжиргаа өдрөөс өдөрт доройтож байна. Үүнийг хэлэлцэх асуудалд нэмж оруулъя.

Хоёрдугаарт, хаврын бүтээн байгуулалттай холбоотойгоор Улаанбаатарын газрын асуудлыг УИХ сонсъё. Нийслэлийнхэн хашаа буулгаж байгаа нь зөв зүйтэй байна. Үүнийг цааш үргэлжлүүлж, бүр төрлийн хашааг нурааж, гарц, зам гаргамаар байна.

Гуравдугаарт, Эрдэнэт үйлдвэрийн технологид тохирдоггүй хүдрийн овоолгыг ашиглах тухай УИХ-ын тогтоолын төсөл мэргэжилнүүдийн тусламжтайгаар боловсруулсан. УИХ-ын тогтоолын төслийг өргөн барих цаг товлож өгнө үү.

УИХ-ын дарга Г.Занданшатар: Газрын шинэчлэл, цахим харилцааны талаар сонссон. Цаг үеийн тулгамдсан асуудлаар Ерөнхий сайд мэдээлэл хийж болно. Дэгийн хуулийн хүрээнд ойрын хугацаанд зохион байгуулж болно.  

Үргэлжлүүлэн "Монгол Улсын эрдэнэсийн сангийн үндсэн сангийн орлого, үндсэн болон гүйлгээний сангийн зарлагын 2022 оны төсвийн тухай” Улсын Их Хурлын тогтоолын төслийг хаалттай хэлэлцэж байна.