Засгийн газрын хуралдаанаас гаргасан шийдвэрийн талаар мэдээлэл хийж байна.

Эрчим хүчний сайд Н.Тавинбэх “Хүлэмжийн хийн ялгарлыг бууруулах зорилгоор гаргасан шийдвэр олон оронд дэмжиж, тодорхой цаг хугацаанд автомашины хэрэглээг бүрэн цахилгаан болгох шийдвэр гаргаад байна. Тиймээс Монгол Улс олон улсын жишигт нийцүүлж ажиллах ёстой. Өнөөдрийн байдлаар Улаанбаатар хотын хэмжээнд 492 цахилгаан автомашин байна. Зам, тээврийн хөгжлийн яамнаас авсан мэдээллээр Монгол Улсын хэмжээнд 1.2 сая автомашин байна. Үүний 662 мянга нь Улаанбаатар хотод байгаа. Энэ тоотой харьцуулбал, 492 цахилгаан автомашин гэдэг нь маш бага тоо юм.  Тиймээс цахилгаан машины хэрэглээг түлхүү нэвтрүүлэх талаар Засгийн газраас тодорхой арга хэмжээ авч хэрэгжүүлэх шаардлагатай байна гэж дүгнэлээ.

Эрчим хүчний  салбарын хувьд үйлдвэрлэлээс хэрэглээ давсан оргил ачааллын үед байгаа учраас цаашид хэрэглээ нэмэгдэх нь хүндрэлтэй. Гэхдээ бидний хийсэн тооцоо судалгаагаар Улаанбаатар хотод хэрэглэгдэж байгаа суудлын автомашины 20-30 хувьд нь цахилгаан автомашин нэвтрүүлэхэд цахилгаан эрчим хүчний хэрэглээ 15-20 квт-аар нэмэгдэх юм байна. Уг нэмэгдэх хэрэглээг оргил ачааллын цагуудаас бусад цагт эрчим хүчний хэрэглээгээр цэнэглэх боломжтой гэсэн тооцоо судалгаа гаргасан.

Өнөөдөр эрчим хүчний зохицуулах хорооноос тогтоосон цахилгаан машиныг цэнэглэх үнэ тариф 155 байна. Цэнэглэх тоног төхөөрөмж суурин найман станц бий болсон байна. 

Мөн Эрдэнэбүрэнгийн усан цахилгаан станцын талаар Засгийн газарт танилцууллаа. Эрдэнэбүрэнгийн усан цахилгаан станц баригдаж ашиглалтад орвол ногоон эрчим хүчээр урт хугацааны баруун бүсийн эрчим хүчний хэрэглээг хангах боломжтой болно. Тус усан цахилгаан станцын хувьд барилга угсралтын ажил эхлэх бүх бэлтгэл ажил хангагдсан. Ганцхан хүндрэлтэй зүйл  нь нөлөөлөлд автаж байгаа иргэдийн асуудал байна. Энэ нь усан цахилгаан станц баригдахтай холбоотой шинээр бий болох усан сангийн газарт одоо ажиллаж амьдарч байгаа нутгийн газар тариалан эрхэлдэг иргэд юм. 270 өрх  бий. Үүний ард 1251 иргэн бий. Нөлөөлөлд автсан иргэдэд зөвхөн үндсэн хөрөнгийн үнэлгээ хийж нөхөн олговор олгож байгаа. Нөхөн олговрын хэмжээг нэмэгдүүлэх талаар ярилцаж байна. 

Сэргээгдэх эрчим хүчний эх үүсвэрээ дэлхий нийт эрчим хүчний хэрэглээгээ хангадаг болж байна" гэж мэдээллээ. 

М.Насан