Украинд суралцдаг монгол оюутнуудын гэр бүлийнхэн Гадаад харилцааны яамны гадаа цуглаад байна. Тэд Оростой тохиролцож, монгол оюутнуудыг яаралтай татан авах ажлыг зохион байгуулахыг ГХЯ-наас шаардаж байна.

-Оюутнуудтай холбоотой байгаа юу? Одоо нөхцөл байдал ямар байгаа бол?

 -Байнга холбоотой байгаа. Хүүхдүүдийн утасны цэнэг дуусаад байгаа учраас нэг нэгээрээ эцэг эх рүүгээ мэдээлэл өгч байна. Эцэг, эх оюутнууд групп чат үүсгээд мэдээлэл авч байна. Бэлэн мөнгөний машинууд ажиллахгүй байгаа учраас хүүхдүүд мөнгөгүй болоод, хоол хүнсээ авч чадахгүй байна. Метроны хоёр буудалд монгол оюутнууд цугларсан байна.

Монгол оюутнуудад хоргодох байр, хоол хүнс, унаа бэлдсэн байгаа гэж ярьсан. Гэвч хүүхдүүдийг хүргэх ямар ч унаа олдохгүй байна. Тиймээс Оросын тохиролцоо хийж, хүүхдүүдээ татан авах шуурхай арга хэмжээ хүсэж байна.

-Таны хүүхэд суралцдаг уу. 41 оюутан эх орондоо ирсэн байна. Яагаад үлдсэн юм бол?

-Миний хоёр эмэгтэй дүү суралцаж байна. Цэргүүд энгийн иргэд рүү дайрахгүй байгаа ч үймээн самуун эхэлчихсэн байна. Метроны буудал руу орохдоо манай дүү бэртэж, мөрөө мулталчихсан. Ухаан алдаж унахад ямар ч эмнэлгийн тусламж байхгүй. Манай хоёр дүү Истанбул руу тийзээ захиалчихсан байсан. Консулын ажилтнууд “дайн болохгүй” гэж инээж шоолоод байхаар нь төгсөх курсын оюутнууд учраас Монгол Улсаас бичиг хүлээгээд үлдчихсэн байсан. Улсаас бид санхүү хүсээгүй, тусгай онгоц ч хүсээгүй. Ганцхан бичиг хүссэн. Удаан хугацаанд худлаа ярьж, хойрго хандсан учраас цаашид яахыг мэдэхгүй, итгэхгүй байна.

-ГХЯ-наас хүүхдүүдийг татаж авахаа мэдэгдсэн. Та бүхэнд албан ёсны мэдээлэл өгсөн үү?

-Энэ сарын 27-ны онгоцны тийз захиалсан гээд байна. Ямар ч боломжгүй зүйл гэдгийг бүх монголчууд мэдэж байгаа. Иргэний агаарын тээвэр бүрэн зогсч, нисэх онгоцны буудал нь ямар ч ажиллагаагүй болчихсон байна.

Ганцхан бичиг хийгээд өгөөч гэж зөндөө удаан хүлээсэн. Хамгийн сүүлд 02 дугаар сарын 13-нд цахим уулзалт хийхэд Консулын газрын дарга Болд “дайн болохгүй, дайн болно гэх нотлох баримт авчир” гэж хэлсэн байна. Өчигдөр болохоор хүүхдүүд одоо харья гэж байгаа юм шиг мэдээлэл хийгээд байна.

Украины сургуулиуд Монгол Улсаас оюутнуудаа татан авах тухай албан ёсны бичиг шаардсан байна. Харин Гадаад харилцааны яамнаас энэ бичгийг өгөхгүй хойрго хандсанаас болж, оюутнууд эх орондоо ирж чадахгүй байдалд орчихоод байгааг эцэг эхийн төлөөлөл хэлж байна. 

Б.Хэрлэн