Цагдаагийн ерөнхий газрын дарга Ж.Болд хэвлэлийн хурал хийж, цагдан хорих 461 дүгээр анги руу Э.Одбаяр нарын иргэд хүч хэрэглэн дайрч, гэмт хэрэгт шалгагдаж байгаа Д.Монголхүүг аваад явсан тухай мэдээлэв.

Иргэн Д.Монголхүү Сүхбаатарын талбайд зөвшөөрөлгүй жагсаал цуглаан зохион байгуулсан, хууль сахиулагчийн шаардлагыг эсэргүүцсэн, цагдаагийн байгууллагаас удаа дараа дуудсан ч ирээгүй гэх шалтгаанаар түүнийг өчигдөр албадан баривчлаад байв. Гэтэл шөнийн 02.30 цагт хэсэг залуус цагдан хорих анги руу дайрч ороод, Д.Монголхүүг аваад зугтжээ.

Гэхдээ...төрийн тусгай хамгаалалттай цагдан хорих байгууллага руу хүссэн бүхэн нь дайрч орох боломжтой юу? Тэгээд цагдаагийн байгууллагын дарга нь гэмт хэрэгт шалгагдаж байгаа этгээдийг аваад зугтчихлаа гэж олон нийтэд мэдээлж, матрын нулимс унагах нь хэр зохимжтой вэ? Хуулийн байгууллага, цагдаа тийм хүчгүй, сул дорой хэрэг үү. Ийм байж яаж хуулийг сахиулж, иргэнийг хамгаалах юм бэ?

Тэгээд ч өнөө цагт төрийн хамгаалалттай цагдан хорих руу байтугай айлын гэр рүү дайрч ордоггүй болсон цаг. Цагдаагийн дарга өөрийгөө хамгаалах бус унагах нүхээ ухав бололтой. Иргэд итгэх нь бүү хэл элэг доог хийж байна. Миний цагдаа үнэхээр намайг хамгаалах уу?

Б.Хэрлэн