Дэлхийн даамын холбоо (FMJD)-ноос зургадугаар сарын 15-наас наймдугаар сарын 25-ны өдрүүдэд цахим хэлбэрээр зохиосон "Үндэстнүүдийн цом" багийн дэлхийн аварга шалгаруулах тэмцээнд амжилттай тоглон түрүүлсэн Монголын даамын эмэгтэй баг тамирчдыг өчигдөр МҮОХ-ны Ерөнхийлөгч Н.Түвшинбаяр хүлээн авч уулзлаа.

Уулзалтад Монголын даамын холбооны удирдлагууд болон тус тэмцээнд амжилттай тоглосон өсвөр үе, залуу даамчид оролцжээ. Тэд “Үндэстнүүдийн цом” тэмцээнд эхний шатанд 11 орны бүсгүйчүүдтэй тойргийн журмаар тоглож, Нидерланд, Суринам, Эстони, Бразил, Беларусийг хожин, Латви, Израиль, БНХАУ-тай тэнцэн, ОХУ, Украинд дийлдэн хэсгээсээ дөрөвдүгээр байраар шалгарчээ. Хасагдах шатанд БНХАУ-ыг 6:2, 8:0-ээр, ОХУ-ыг 4:4, 7:1-ээр буулганавч, шигшээ тоглолтод шалгаран үлдсэн юм. Улмаар аваргын төлөө Беларусийн багтай тоглож, хоёр тоглолтын нийлбэр дүнгээр 9:7-оор хожин, анхны тэмцээний аваргаар тодорсон билээ.

Монголын багийн бүрэлдэхүүн:

1. Баярын МИШЭЭЛ – Олон улсын их мастер, FMJD чансаа 2070

2. Энхболдын ХҮСЛЭН - Дэлхийн даамын холбооны мастер, 2070

3. Ганбаагийн ХЭРЛЭНМӨРӨН - Дэлхийн даамын холбооны мастер, 2041

4. Мөнхбаатарын НЯМЖАРГАЛ – Олон улсын их мастер, 2023

5. Баатархүүгийн МӨНХЖИН - Дэлхийн даамын холбооны мастер, 2020

6. Норовсүрэнгийн ЛХАГВАДОЛГОР - Дэлхийн даамын холбооны дэд мастер, 2005

7. Батдэлгэрийн НАНДИНЦЭЦЭГ - Дэлхийн даамын холбооны мастер, 2001

8. Баатархүүгийн АНУЖИН - Спортын мастер, 1989

Ц.Ганбат