Монголын үндэсний худалдаа аж үйлдвэрийн танхимын ерөнхийлөгчийн сонгууль энэ сарын 28-нд болно. Тус сонгуульд нэр дэвшихээ одоогоор МҮХАҮТ-ийн одоогийн ерөнхийлөгч Б.Лхагважав, CEO клубийн ерөнхийлөгч, “Ард санхүүгийн нэгдэл”-ийн гүйцэтгэх захирал Ч.Ганхуяг, UFC группийн ТУЗ-ийн дарга О.Амартүвшин, БНН-ын дарга Б.Жаргалсайхан нар мэдэгдээд байна. “Ард санхүүгийн нэгдэл”-ийн гүйцэтгэх захирал Ч.Ганхуяг нэр дэвшиж буйгаа зарлаж өнөөдөр /2019.02.22/ сэтгүүлчдэд мэдээлэл хийлээ. Энэ үеэр түүнээс зарим зүйлийг тодрууллаа.

-Та МҮХАҮТ-ийн ерөнхийлөгчөөр сонгогдвол цалингүй ажиллана гэв үү?

-Намайг зарим хүмүүс цалин авахгүй ажиллана гэхээр “Яах гээв” гэнэ. Тэнд сүүлийн дөрвөн жил ажил яваагүйн нэг шалтгаан нь мөнгийг хэн удирдах вэ, хэн хэдэн төгрөгийн цалин авах вэ гэдэг жижигхэн “гал тогооны” хэрүүл явагдсан юм. Би үүнээс өөрийгөө хамгаалж байгаа. Ийм зүйлд би цагаа зармааргүй байна. “Ард кредит” IPO, Хөрөнгө оруулагч үндэстэн гээд хийх ажил маш их байна. Тэгэхээр өөрөөсөө гаргаж ирж байгаа, хулгайлаад аваачиж байгаа жаахан цагаа зорилгодоо л зарцуулна. Тэрнээс жижиг зүйл ярьсан хэрүүлд би оролцмооргүй байна. Надад тэр хэрүүл хэрэггүй. Үнэхээр өгөх зарчим байгаа бол би түүнийг нь аваад сэтгүүлчдийн боловсролын санд нь хийнэ. Тэгээд сэтгүүлчдийн хүрээлэн ажиллуулна. Тэр илүү хэрэгтэй байна.

-Танхимын үйл ажиллагааг ямар зарчмаар удирдах юм?

-Хананд хадаас зоох гэхээр миний бяр хүрэхгүй байсан. Би хүмүүст мөнгө төлөөд гэр бариулж байгаад жагсаж чадахгүй. Хэн ч хийхгүй байгаа юм бол би хийе. Судалгааны хүрээлэнг нь ажиллуулъя. Энэ засагт шийдвэр, хууль гаргахад нь үндэслэлтэй, олон нийтийн, эрдэмтэн шинжээчдийн, бизнесийн нөхдүүдийн дуу хоолойг хүргүүлж амьдралд ойрхон хуулийг гаргадаг болъё. Амьд холбоос нь болъё. Болохгүй байгаа нөхдүүдийг очиж “лантууддаг” болъё.

Өнөөдөр хэтэрхий хаалттай байгаад байна. Жижигхэн эрх мэдлүүд хоорондоо тэмцэлдээд байгаа тул хаалттай байхаас өөр аргагүйд хүрсэн. Үүнийг нэгтгэж байж хүч болгохгүй бол бизнес эрхлэгчид өнөөдөр дэндүү тархай бутархай байна. Улстөрчдөд яг  энэ байдлыг нь хадгалаад үлдвэл ашигтай байдалд орчихоод байна. Дэмбэрэл даргатай энэ байгууллагын түүх, хөгжил замнал салшгүй холбоотой. Одоо танхим үзэсгэлэн худалдаагаа зохион байгуулж чадахаа байчихсан. Ногоон хөгжлийн сан нь бас буруу замаар орсон. Энэ мэт болохгүй байгаа зүйлүүд нь хувь хүний ашиг сонирхлын зөрчил хэтэрхий их орсноос үүдэлтэй. Цалин, шагнал урамшуулалдаа шуналтдаг энэ байдлыг л бид таслан зогсоохгүй бол байгууллагаа нураагаад байна.

-Таныг нэр дэвшүүлэхгүйн тулд дүрмээ өөрчилсөн тухай бичсэн байсан?

-Өмнө нь удирдах зөвлөлд гурван жил ажиллаж байсан хүнийг л нэр дэвшүүлж даргаар сонгоно гэж дүрмээ өөрчилсөн. Учир нь бии нэр дэвшиж байгаа болохоор. Ийм өчүүхэн булхай оруулж дүрмийн өөрчлөлтийг нийт гишүүдийн хурлаасаа баталж хүчин төгөлдөр болно гэсэн заалтыг зөрчиж байна.

-МҮХАҮТ-ын ерөнхийлөгчийн сонгууль энэ удаад их л сүр дуулиантай болж байх шиг. Өмнө нь нам гүмхэн явагддаг байсан санагдана.

-Бас л би нэр дэвшиж байгаа болохоор. Түрүүчийн сонгуулиар Дэмбэрэл дарга ажлаа өгөхөөр болоод Лхагважав Амартүвшин хоёр өрсөлдсөн. Энэ сонгууль чи намайг тэгчих, тэгвэл би чамайг ингэнэ гэсэн Монголд тогтчихсон хэвшвэл байдлаар явагдсан. Энэ сонгууль өглөөний 05.00 цагт дууссан. Хүмүүс захиалгатайгаар очих хурлыг үймүүлэх, хашхирах үйлдлийг хийсэн гэсэн. Би тоодоггүй байсан. Энэ удаад тэр байгууллагад булхайтай зүйл оруулахгүйн тул би оролцож байгаа юм.

Г.Сүрэн