Монголын хөрөнгийн биржийн нэгдүгээр ангилалд бүртгэлтэй “Ард Даатгал” компани энэ оны есдүгээр сард IPO хийж, олон нийтээс 5.25 тэрбум төгрөг татан төвлөрүүлсэн. Тус компанийн хувьцаа эзэмшигчдийн ээлжит бус хурал бямба гарагт боллоо.

Даатгалын компаниудаас хөрөнгийн зах зээлд анх удаагаа хөл тавьсан “Ард Даатгал” энэ удаа компанийн дүрмээ шинэчлэн баталлаа. “Ард Даатгал” IPO хийснээр “Ард санхүүгийн нэгдэл”-ийн эзэмшлийн хувьцаа 66.7 хувь болж буурсан байна. Харин шинэ хувьцаа эзэмшигч нар 30 хувь болж нэмэгдсэн бөгөөд нийт 1500 орчим хөрөнгө оруулагчтай болжээ. Тус компанийн нийт хувьцааны 19 хувийг иргэд, үлдсэн 81 хувийг аж ахуйн нэгж эзэмшиж байна.

“Ард Даатгал” 2017 онд 1.1 тэрбум төгрөгийн цэвэр ашигтай ажилласан бөгөөд тайлант хугацаанд өөрийн хөрөнгийн өгөөж 23.7 хувьтай байсан.