“Татвар төлөгчийн өдрүүд”-ийг тохиолдуулан “Е-баримтын хэрэглээ зах, худалдааны төвүүдэд” сэдвийн хүрээнд Нарантуул олон улсын худалдааны төвд ТЕГ, Нийслэлийн татварын газар, есөн дүүргийн Татварын хэлтэс, Хэрэглэгчийн систем нийлүүлэгчдийн холбоо, Татварын мэргэшсэн зөвлөхийн нийгэмлэг, “Нарантуул” захын удирдлагууд хамтран өдөрлөг зохион байгууллаа.

Өдөрлөгийн үеэр Хэрэглэгчийн систем нийлүүлэгчдийн холбооны кассын машин, POS төхөөрөмж нийлүүлэгч компаниудын үзэсгэлэн худалдааг дэлгэв. Хэрэглэгчийн систем нийлүүлэгчдийн холбооны тэргүүн Ж.Баянмөнх “Хэрэглэгчийн систем нийлүүлэгчдийн холбоо 2016 онд байгуулагдсан. Монголын программ хангамжийн салбарт тэргүүлэх байр суурийг эзлэн ажиллаж байгаа компаниудыг нэгтгээд одоогоор 21 гишүүн байгууллагатай ажиллаж байна. Эдгээр гишүүд маань НӨАТ-ын хууль хэрэгжиж эхэлснээр и-баримт олгох цахим системийг хэрэглээнд нэвтрүүлснээр Монгол Улсын эдийн засагт хувь нэмэр оруулж байгаа билээ. Одоогийн байдлаар 45 мянган баримт хэвлэх машиныг суурилуулсан гэж бүртгүүлсэн байна. Эдгээрийн 50-иас илүү хувь буюу 25 мянган хэрэглэгчийг өөрсдийнхөө баталгаат бүтээгдэхүүнээр хангаж, үйлчилгээгээ үзүүлээд явж байна. Өнөөдрийн өдөрлөгт манай холбооны гишүүн 10 гаруй байгууллага хямд үнэтэй, ажиллахад хялбар, баталгаат үйлчилгээтэй бүтээгдэхүүнээ танилцуулж байна. Нарантуул захын бас нэг онцлог бол Улаанбаатар хот төдийгүй хөдөө, орон нутгийн бизнес эрхлэгчид, аж ахуйн нэгжүүд, иргэд хүнс, өргөн хэрэглээний бараагаа эндээс хангадаг. Тэр ч утгаараа Монгол Улсын дотоодын худалдаа, бараа эргэлтэд өндөр хувь эзэлдэг. Эдийн засагт үзүүлэх нөлөө нь ч нэлээд өндөр хувьтай байдаг. Энд бизнес эрхэлж байгаа ААН, худалдаачид НӨАТ-ын тухай хуулийн хэрэгжилтийг хангаж, и-баримтыг олгож эхэлснээрээ худалдан авагчдынхаа НӨАТ-ын буцаалтыг авах, сугалаанд оролцох эрхийг хангахаас гадна Монгол Улсын эдийн засгийг эрүүлжүүлэх үйлсэд жинтэй хувь нэмэр оруулна гэж бид үздэг" гэв.

Өдөрлөгийн үеэр Хэрэглэгчийн систем нийлүүлэгчдийн холбооны гишүүн аж ахуйн нэгжүүд оролцож, НӨАТ-ын тухай хуулийг хэрэгжүүлэхэд ашиглах боломжтой төхөөрөмжүүдийг танилцууллаа. Тухайлбал, и-баримтыг www.ebarimt.mn вэб сайт, кассын машин, гар утасны апликейшн ашиглан гурван янзын төхөөрөмжөөр олгож байгаа бол одоо банкны терминаль дээр программ суулган шууд и-баримтыг олгодог болох шинэ системийг нэвтрүүлэхээр ажиллаж байгаа юм байна. 

“Нарантуул” худалдааны төвд и-баримтын хэрэгжилт ямар түвшинд байгааг Баянзүрх дүүргийн Татварын хэлтсийн Хувь хүний татварын тасгийн дарга  Ю.Лувсанцэрэнгээс тодрууллаа.

-“Татварын хуулийг хэн сайн мэдэх вэ” тэмцээнийг яагаад заавал “Нарантуул” ОУХТ дээр зохион байгуулах болсон юм бэ?

-“Нарантуул” ОУХТ бол маш их хүнтэй, хөдөө орон нутгаас ч хүмүүс ирж худалдан авалт хийдэг. Гэвч энэ захаас худалдан авалт хийсэн иргэд и-баримтаа авч чадахгүй байна гэсэн гомдлыг маш ихээр ирүүлдэг. Тиймээс “Нарантуул” зах дээр и-баримтын хэрэгжилтийг сайжруулснаар энэ системийн хэрэглээ нэмэгдэнэ гэж харж байна.

-Бусад худалдааны төвүүд, ялангуяа сүлжээ дэлгүүрүүд и-баримтыг иргэдэд маш сайн олгодог. Харин “Нарантуул” захын аль ч хэсэгт энэ систем нэвтрээгүй байгаа юм уу?

-НӨАТ-ын тухай хууль 2016 оны нэгдүгээр сарын 01-нээс хэрэгжиж эхэлсэн. Манай Баянзүрх дүүргийн Татварын хэлтэс НӨАТ-ын тухай хуулийг хэрэгжүүлэх тал дээр анхаарч ажиллаж ирсэн. Тухайлбал, “Нарантуул” захын өргөтгөлийн хэсгийг зургаан багт хуваан авч ажиллаад, тэр хэсэгт бүрэн нэвтрүүлээд байгаа. Учир нь өргөтгөлөөс орон нутгийн иргэд бараа материалаа бөөнөөр нь татдаг. Тийм болохоор “Нарантуул” зах дээр НӨАТУС-ны хэрэгжилтийг хангах ажлыг өргөтгөлөөс нь эхлүүлсэн. Харин өнгөрсөн долоо хоногт манай НӨАТУС-ны ажлын хэсэг Баялаг-Ундраа төвийн бизнес эрхлэгчдэд хуулийн талаар сурталчилж, бүх худалдаачдыг цахим төлбөрийн системд холбох арга хэмжээг авч байна. Одоо “Нарантуул” захын задгай хэсэг буюу жижиглэнгээр худалдаа эрхэлдэг хүмүүсийг хамруулах ажил л хамгийн хүндрэлтэй байна.