Жирэмсэн эх таныг нойрноос тань гэнэт сэрээгээд намждаг өвдөлт байдаг. Ийм үед та өөрийн эргэлзээгээ арилгаж дутуу төрөхөөр завдаж байна уу эсвэл зөвхөн умайн холбоос татагдсанаас өвдөлт илрэв үү гэдгийг магадлахын тулд эмч, эх баригч нараасаа утсаар зөвлөгөө авч болно. Гэнэтийн өвдөлт нь таны жирэмсний хугацаа ямар байгаагаас болон ужиг дурдатгалтай зэргээс хамаарч яаралтай тусламж шаардагдах эсэх нь хамаардаг. Ийм учраас хяналтын эмчдээ хандан зөвлөгөө авч цаашид авах арга хэмжээний талаар зөвшилцөх хэрэгтэй. Хэрэв танд дараах шинж тэмдэгүүд илэрвэл заавал эмчид хандаарай. Үүнд: • Таны хүүхдийн хөдөлгөөн хэвийн үеийнхээсээ цөөн байх. Эмч танд хүүхдийнхээ хөдөлгөөнийг тоолж хянах аргыг зааж өгсөн байж магадгүй. • Хэвлийгээр байнгын хүчтэй өвдөх болон эмзэглэл ихтэй болох • Үтрээнээс цус гарах • Үтрээний шүүрлийн хэмжээ болон шинж чанар нь өөрчлөгдөх:усархаг, салиархаг, цусархаг байдалтай болох. Харин жирэмсний 37 долоо хоногоос хойш үтрээний шүүрэл сариархаг, цусны судалтай болох нь хэвийн үзэгдэл бөгөөд төрөлт дөхөж байгааг илтгэнэ. • Жирэмсний 37 долоо хоногоос эрт хугацаанд доош тулж өвдөх (хүүхэд доошлосон юм шиг санагдах), ууц нуруу чилэх (ялангуяа энэ шинж тэмдэг шинээр илэрч байгаа бол), хэвлийн өвдөлт, биений юм ирэх үеийнхтэй төстөй агшилт илрэх, умайн базлалт цагт дөрвөөс олон илэрвэл зэрэг шинж тэмдэгүүд илэрвэл • Шээх үед халуу оргиж өвдөх, шээсний хэмжээ багасах болон гарахгүй байх • Олон удаа бөөлжих, бөөлжилттэй цуг өвдөлт болон халууралт илэрвэл • Өндөр халуурч чичрүүлэх • Юм хоёрчилж харагдах, бүрэлзэх, оч гялалзах зэрэг харааны өөрчлөлт илрэх • Толгой байнга хүчтэй өвдөх болон толгойн өвдөлт хэл ээдрэх, бадайрах зэрэг шинж тэмдэгтэй хамт илрэх • Нүүр болон зовиор хавагнах, гар болон хөлийн шилбэ шагай орчмоор гэнэт ихээр хавагнах, биеийн жин огцом нэмэгдэх (долоо хоногт 1800 грамаас илүү хэмжээгээр) • Хөлийн булчин байнга хүчтэй зангирч өвдөх, өвдөлт хөлийн байрлалаа өөрчлөх болон явахад намдахгүй байх эсвэл нөгөө талын хөлнөөсөө илүү хавдах. • Хэвлийн гэмтэл • Ухаан балартах, толгой эргэх, зүрх дэлсэх • Амьсгалахад саадтай болох, цээжээр өвдөх, цустай цэр гарах • Хэвлийн өвдөлттэй хамт өтгөн хаталт илрэх эсвэл олон удаа суулгах • Их бие, гар, хөл, гарын алга, хөлийн ул зэрэг газруудаар байнга ихээр загатнах эсвэл бүх биеэр загатнах шинж тэмдэг илэрвэл • Томуу төст шинж тэмдгүүд илрэх. Хэрэв гахайн ханиад буюу H1N1 вурсын халдвар байвал жирэмсэн эмэгтэйчүүдэд өндөр эрсдэлтэй. Хэрэв та ханиад хүрсэн болон ханиад төст шинж тэмдэг илэрсэн хүмүүстэй хавьталтай байсан бол эсвэл танд халууралт, хоолой хөндүүрлэх, ханиалгах, хамар битүүрэх болон шингэн нус гарах, бие өвдөх, чичрүүдэс хүрэх зэрэг шинж тэмдэгүүд илэрвэл эмнэлэгт даруй хандаарай. Мөн дээрх шинж тэмдгүүдтэй хамт бөөлжих, суулгах шинж тэмдгүүд илэрч болно. Хэрэв танд амьсгал өнгөц болох, амьсгалахад бэрхшээлтэй болох, цээж болон хэвлийгээр өвдөх, гэнэт толгой эргэх, ухаан балартах, эмэнд дарагдахгүй өндөр халуурах, олон дахин бөөлжих болон хүүхдийн хөдөлгөөн эрс багасах зэрэг шинж тэмдэгүүд илэрвэл эмчимт эмчилгээ яаралтай хийлгэх шаардлагатай. • Сэтгэл гутрал болох санаа зовсон байдал илрэх. Хэрэв танд уйтгар гуниг, өөртөө итгэлгүй байдал, сэтгэлийн хүчтэй гутрал илрэхээс гадна өөрийн өдөр тутмын үүрэг хариуцлагаа биелүүлж чадахгүй болох эсвэл өөрийгөө гэмтээх бодол төрөх болвол даруй тусламж авах шаардлагатай. • Мөн жирэмслэлттэй холбоогүй эрүүл мэндийн асуудал гарвал тухайн мэргэжлийн эмчид үзүүлж зөвлөгөө аваарай. Та биеийнхээ байдлын өөрөө хэвийн гэж дүгнэж байвч хурдан хугацаанд өөрчлөгдөн ноцтой шинж тэмдэгүүд илэрч эхэлвэл заавал эмчид хандаарай. Таны дуудлагыг эмч тань хүлээж авах болно. Шаардлагатай бол яаралтай тусламжид хамрагдана. Хэрэв бүх зүйл хэвийн бол гэртээ ажиглаж болно. Emch.mn