НӨАТ–ын буцаан олголтыг уржигдар оройноос эхлэн иргэдийн данс руу шилжүүлж эхэлсэн. Гэвч хувийн мэдээлэл нь алдаатай 19 мянган иргэн татварын буцаан олголтоо авч чадаагүй байгаа юм. Эдгээр иргэд мөнгөө нөхөж авч болох эсэхийг Гааль, татвар, санхүүгийн мэдээллийн технологийн төвийн Олон нийттэй харилцах албаны менежер Б.Чинзоригоос тодрууллаа.

–НӨАТ–ын буцаан олголт иргэдийн данс руу шилжиж байна. Заасан хугацаанд хувийн мэдээллээ засварлаагүй иргэд мөнгөө нөхөж авч болох уу?

-НӨАТ-ын буцаан олголтыг нийт 650 мянга гаруй иргэн авахаар бүртгүүлсэн байна. Эндээс 19 мянган иргэний хувийн бүртгэлийн мэдээлэл алдаатай гарсан. Эдгээр хүмүүс мөнгөө нөхөж авах боломжтой. Тодруулбал, хувийн болон бүртгэлийн мэдээлэл нь алдаатай хүмүүс мэдээллээ засварлах боломжтой.НӨАТ-ын эхний ээлжийн мөнгө орж дууссаны дараа эдгээр хүмүүсийн  мэдээлэл манайд дахин ирнэ.

–Мэдээлэл засварлахын тулд заавал тат­варын албанд хандах уу?

-Татварын албанд хандах шаардлагагүй. Хувь хүн өөрийнхөө и-баримтаар нэвтэрч  мэдээллээ нягтлах хэрэгтэй. Мэдээлэл үнэн зөв болчихвол эхний ээлжийн мөнгө бүрэн олгогдсоны дараа нөхөн шилжүүлнэ. Тиймээс аль болох ойрын хугацаанд мэдээллээ нягтлах хэрэгтэй.

Эх сурвалж: “Зууны мэдээ” сонин 

А.ЦЭРЭНДОРЖ