МХБХ-ны Хүрхрээ Үндэсний лиг өндөрлөх дөхсөн энэ үед Холбооны цомын тэмцээн ч мөн хаалтаа хийх дөхсөөр. Тэгвэл өчигдөр цомын тэмцээний хагас шигшээн эхний учраа хоорондоо тоглосон нь Эрчим-Улаанбаатар сити клубүүд байсан юм. Үндэсний лигийн хүснэгтийг тэргүүлэгчдийн өрсөлдөөн бүтэн 90 минутын турш сонирхолтой үргэлжилсэн бөгөөд цорын ганц гоолоор тоглолт шийдэгджээ.

Энэхүү гоолын эзэн нь Улаанбаатар сити клубын хагас хамгаалагч Н.Цэдэнбал байсан бөгөөд тоглолтын 85 дахь минутанд Эрчимийн хаалгыг мялаасан юм. Ингээд түүний хожлын гоолын ачаар Улаанбаатар сити клуб анх удаа Монголын хөлбөмбөгийн холбооны цомын тэмцээний шигшээд өрсөлдөх эрхтэй болжээ. Лигт 11 дэх удаагаа түрүүлэх болзолоо хангасан Эрчим клубын хувьд шөвгийн дөрвөөс тэмцээнээ дуусгасан юм.

Холбооны цомын тэмцээний хагас шигшээн нөгөө тоглолт өнөө орой 19:00 цагаас МХБХ-ны цэнгэлдэх хүрээлэнд тоглоно. FC Улаанбаатар - Дэрэн багуудын аль хожсон нь 10-р сарын 8-ны өдөр Улаанбаатар сититэй Холбооны цомын төлөө өрсөлдөх юм. 

Г.Баяраа