Испанийн эзэн хааны Реал Мадрид баг Ла лигийн 4-р тойрогт Реал Сосьедад багийн талбайд зочилж тоглосон. Хоёр дараалан тэнцээд байсан Мадрид хотын баг уг тоглолтод 3-1 харьцаатай ялалт байгуулснаар лигийн хүснэгтийн IV  байр руу дэвшин орсон билээ.

Харин энэхүү тоглолтын дараа Реал Мадрид нэгэн сонирхолтой дээд амжилтыг давтсан бөгөөд хамгийн олон тоглолтод дараалан гоол оруулсан амжилтыг давтсан юм. Тэдний дараалан гоол оруулсан тоглолтын тоо 73-т хүртсэн нь Бразилийн алдарт Сантос багийн тогтоосон дээд амжилттай зэрэгцсэн байна. Сантос клуб домогт Пелегийн эрин үед буюу 1962-1963 оны улиралд энэхүү амжилтыг тогтоож байсан нь мэргэжлийн хөлбөмбөгийн дээд амжилтаар бүртгэгдээд байсан юм.

Реал Мадрид багийн хувьд дараагийн тоглолтоо маргааш Реал Бетис багийн эсрэг хийнэ. Хэрвээ энэ тоглолтод тэд гоол оруулж чадвал дээд амжилтыг ганцаараа эзэмшиж эхлэх билээ.

Г.Баяраа