Туркменистаны Ашбагат хотод Азийн танхимын болон тулааны спортын тавдугаар наадам болж байна. Тав дахь удаагийн тус наадамд манай улсаас спортын 12 төрөлд 64 тамирчин өрсөлдсөнөөс Туркмен үндэсний бөхийн эмэгтэйчүүдийн +70 кг-ын жинд О.Мөнхцэцэг алтан медаль хүртсэн бол энэ жинд Г.Сарангоо дэд байрт оров. Түүнчлэн тус спортын эрэгтэйчүүдийн +100 кг-д Г.Хүрэлбаатар хүрэл, жюү жицү бөхийн 85 кг-д Т.Отгонзаяа хүрэл медаль хүртсэн байна.

Дөрвөн жилийн өмнө тус наадам БНСУ-ын Инччён хотод болоход Монголын баг тамирчид нэг алт, нэг мөнгө, хоёр хүрэл медаль хүртэж байв. Энэ удаагийн наадам эхлээд дөнгөж гурав хоноход манай тамирчид дөрвөн жилийн өмнөх амжилтаа үзүүлж чаджээ.