Манай гаригийн хамгийн нэр хүндтэй бэйсболын тэмцээн бол Хойд Америкийн Мэжор лиг байдаг. Тэгвэл 100 гаруй жилийн түүхтэй уг лигт өмнө нь тогтоогдож байгаагаагүй нэгэн дээд амжилтыг Кливлэнд Индианс багийнхан үзүүлэхэд ойртсоор байна.

Тус баг өнөө өглөө Канзас сити Рояьлс багийн эсрэг тоглосон бөгөөд 3-2 харьцаатай ялалт байгуулснаар 22 дахь дараалсан хожлоо авч MLB-н түүхэнд II байранд бичигдэх амжилтыг үзүүлжээ. Тэд дахин 4 хожил авахад түүхэн дээд амжилттай зэрэгцэх юм.

Анх 1903 оноос зохиогдох болсон Бэйсболын Мэжор лигийн түүхэн дээд амжилтыг домогт Нью Йорк Жайнтс баг эзэмшдэг юм. Тус баг 1916 оны улиралд дараалан 26 тоглолтод хожсон нь дээд амжилтаар бүртгэгдсэн байдаг аж.

Кливлэнд Индианс баг Канзас сити багтай энэ долоо хоногт дахин 3 тоглолтыг хийх бол нэг хоног завсарлаад Лос Анжелестай мөн 3 дараалан тоглох хуваарьтай байна.   

Г.Баяраа