Сүүлийн жилүүдэд танхимын спортууд хүүхэд залуусын сонирхлыг татаж, улмаар гудамжинд хүртэл хялбаршуулсан дүрэмтэйгээр салбарлан хөгжих чиг хандлага үзэгдэх болсон. Үүний нэг жишээ нь гурвын эсрэг гурав буюу 3х3 сагсан бөмбөг юм. Уг төрлийг Олимпийн төрөлд хүртэл оруулахаар болоод байгаа. Манай Улаанбаатар Хангарьд баг ч гэсэн энэ төрлөөр чамлахааргүй амжилт гаргаж байгаа нь үнэн.

Саяхан Токиогийн их дуулгад шилдэг дөрөвт багтаж чадсан Улаанбаатар Хангарьд баг удахгүй дараагийн тэмцээнд хүчээ сорих нь ээ. Тодруулбал Германы Берлин, Тайваний Тайжуны гран при тэмцээнүүд манай багийг хүлээж байна. Эдгээрээс Тайжун гран прид оролцохоор манай баг Тайванийг зорихоор болжээ. Ирэх амралтын өдрүүдэд болох уг тэмцээнд хэрвээ шигшээд шалгарч чадвал 09 сарын 23, 24-нд БНХАУ-д болох Ченгдугийн их дуулгат оролцох эрх авах ач холбогдолтой юм. Тайчуний гран при тэмцээнд бидний сайн мэдэх Люблянаас эхлээд ДАШТ-ий мөнгөн медальт Амстердам, Европ тивийн аварга Рига зэрэг хүчирхэг багууд өрсөлдөх юм.

Улаанбаатар Хангарьд багийн хувьд тэмцээний С хэсэгт Латвийн Рига, Иордан улсын Петра, Тайваний Тайжун багуудтай нэг хэсэгт ороод байна. Харин бүрэлдэхүүний хувьд бага зэргийн өөрчлөлт оруулж Э.Цэрэнбаатарын оронд А.Гансүхийг эгнээндээ нэгтгэсэн юм. Тэднээс гадна бидний танил сагсчид болох Э.Дөлгөөн, Д.Дэлгэрням, Г.Цэнгүүнбаяр гэсэн бүрэлдэхүүнтэйгээр тус тэмцээнд хүч сорино. Багийн ахлах дасгалжуулагчаар С.Тулга ажиллана.

Б.Энх-Амгалан