Италийн шилдэг автомашин үйлдвэрлэгч Феррари, унадаг дугуй үйлдвэрлэгч Бианки компаниуд өнгөрсөн 6-р сард хамтран ажиллах гэрээнд гарын үсэг зурсан. Өөр өөрийн салбартаа технологийн тэргүүлэгч байж чаддаг энэ компаниуд хамтарч засмал замын, уулын, электрон зэрэг олон төрлийн дугуйг үлдвэрлэхээр болсон юм.

Тэгвэл уг хамтын ажиллагааны хамгийн эхний бүтээгдэхүүн бэлэн болжээ. Энэхүү дугуй нь триатлоны спортод зориулагдсан загвар байсан бөгөөд SF01 нэртэй бүтээл байлаа. Хоёр компанийн инженерүүд болон загвар зохион бүтээгчид хамтран ажиллаж гаргасан энэхүү загварыг Герман улсад болсон “Eurobike Trade” нэртэй үзэсгэлэнгийн үеэр анх олон нийтэд дэлгэсэн байна.

Өд мэт хөнгөн хийгдсэн энэ дугуйг бүхэлдээ карбоноос бүтэх бөгөөд дан их бие (рама) нь ердөө 780 грамм жинтэй аж. Мөн энэ дугуйны суудлыг Ферраригийн инженерүүд бүтээсэн бөгөөд дангаараа 94 грамм жинтэй болжээ.

Сонирхуулахад Феррари, Бианки компаниуд тун удахгүй унадаг дугуйн хөгжлийн нэг алхам ахиулсан бүтээлийг танилцуулах гэнэ. Энэ нь цоо шинэ хийцийн их бие (рама) байх аж.

Г.Баяраа