Автомашины тэргүүн ангиллын уралдаан Формула 1 ДАШТ-ий Италийн гранпри энэ амралтын өдрүүдэд болно. Энэ нь улирлын хуваарьт багтсан 13 дахь уралдаан билээ. Тэгвэл өчигдөр уламжлал ёсоор гранпригийн өмнөх албан ёсны сорил Монца авто тойруулгад болсон байна. Уг сорилд ДАШТ-нд өрсөлдөгч 20 нисгэгч бүгдээрээ оролцсон бөгөөд хамгийн өндөр амжилтыг Германы Мерседес багийнхан үзүүлсэн байна. Үдээс өмнөх сорилын хүснэгтийг Их Британи нисгэгч Льюис Хамилтон тэргүүлсэн бөгөөд 5.793 км урттай Монца авто тойруулгыг 1 минут 21.537 секундын хугацаанд тойрсон байна. Хүснэгтийн дараагийн байранд түүний багийн хамтрагч Финляндын Вальтери Боттас орсон бөгөөд тэргүүлэгчээс 0.4 секундын зөрүүтэй хугацааг үзүүлсэн байна. Харин үдээс хойшхи сорилыг В.Боттас тэргүүлсэн бол Л.Хамилтон дэд байранд бичигдсэн байна.

Тэгвэл сорилын хүснэгтийн дараагийн байруудад Феррари, Рэд Булл, Форс Индиа багийн хослолууд хамтдаа орсон байна. Энэхүү үр дүнгээс харахад Мерседес багийн гишүүд Италийн гранприд өндөр амжилт гаргах магадлалтай байна. Монца авто тойруулгад болсон сүүлийн 3 жилийн уралдаанд Мерседес баг ялалт байгуулаад байгаа бол Феррари баг хамгийн сүүлд 2010 онд тэргүүн байранд орсон юм.   

Г.Баяраа