E-sport буюу цахим компьютер тоглоом нь анх зугаа гаргах хэрэглэл төдий байсан. Харин одоо энэ ойлголтоос хальсан. Тиймдээ ч бидний мэдэх CS:GO, Dota 2, LOL зэрэг тоглоомын дэлхийн аварга шалгаруулах асар өндөр шагналын сантай тэмцээн уралдаанууд зохиогдож, мэргэжлийн тоглогчид хүртэл том гэрээ үзэглэдэг болоод байна.

Үүнтэй холбоотойгоор шинэ тутам үүсэн бий болж, хандлага бүрэлдэж буй уг спортыг 2024 оны Олимпийн Наадмаас эхлээд Олимпийн төрөлд нэмэх яриа яригдах болсон. Үүн дээр Олон Улсын Олимпийн хорооны ерөнхийлөгч Томас Бах өөрийн байр суурийг илэрхийллээ. Тэрбээр “Манай байгууллагын гол зорилго бол хүчирхийлэлгүй, ялгаварлан гадуурхахын эсрэг байж бүх нийтийн дунд энх тайванг таниулан сурталчлах. Харин энэ зорилго маань видео тоглоомтой харшилж байна. Видео тоглоомд маш их хүчирхийлэл, аллага, дэлбэрэлт, тэсрэлт дүрслэгддэг. Эндээс бүх зүйл ойлгомжтой болж байна” хэмээжээ.

Эндээс үзэхэд e-sport Олимпийн төрөлд багтахгүй бололтой.

Б.Энх-Амгалан