Английн шилдэг залуу хөлбөмбөгчдийн тоонд багтах Эвертон клубын хагас хамгаалагч Росс Баркли энэ зун багаасаа явах нь бараг тодорхой болоод байсан. Ливерпүүл хотын баг түүнийг 50 сая фунтээр үнэлээд байсан нь ч нууц биш. Харин шилдэг хагас хамгаалагч урт хугацааны гэмтэл авсан нь түүний наймаанд багагүй нөлөө үзүүлж байна. Дөнгөж өчигдөр л гэхэд түүний төлөө Челси клуб 25 сая фунтын санал хүргүүсэн ч Эвертон тэр даруй татгалзсан байна.

Солилцооны цонх хаагдахад 24 хүрэхгүй цагийн хугацаа үлдээд байгаа энэ үед Росс Барклигийн төлөө өөр багаас санал ирэхгүй бол Эвертон клуб хагас хамгаалагчаа авч үлдэхээс өөр сонголтгүй болно. Энэ жил 23 настай Р.Баркли шөрмөсний гэмтлийн улмаас 3 сарын хугацаанд талбайд гарахааргүй болсон. Эвертон клубын хүүхдийн академиас төрөн гарсан тэрбээр үндсэн багт дуудагдаж 6 улирлыг үдэхдээ 179 тоглолтод оролцож 27 гоол оруулаад байгаа юм.    

Г.Баяраа