Мотоциклийн тэргүүн ангиллын уралдаан МотоЖП-н ДАШТ-ий ээлжит гранпри Их Британи улсад боллоо. Алдарт Силверстөүн авто тойруулгад болсон уг уралдаан нь энэ жилийн хуваарьт багтсан 12 дахь уралдаан байсан юм. Гранпригийн ялагчаар Дукати багийн Итали нисгэгч Андреа Довизиосо тодорч бүтэн оноо авсан байна. Улмаар тэрбээр ДАШТ-ийг нийлбэр оноогоор тэргүүлж эхэлсэн байна. Учир нь хуучин тэргүүлэгч Испанийн Марк Маркес 13 дахь тойрогт уралдааныг орхисноор Их Британийн гранпригээс нэг ч оноо авч чадсангүй.

Харин уралдааны дэд байранд Яамаха багийн Маверик Виналес орсон бол 3-р байрыг домогт Валентино Росси эзэлсэн байна. ДАШТ-ийг тэргүүлж эхэлсэн Итали залуу 183 оноотой байгаа бол араас нь М.Маркес 9 оноо дутуу бичигдэж байна. Дараагийн гранпри 9-р сарын 10-нд Сан Маринод болно. 

Г.Баяраа