Өнөөдрөөс сар шахам хугацааны өмнө Даниэл Кормиэр, Жон Жонс гэсэн тулаан UFC сонирхогч хүн бүрийг зурагтных нь өмнө уясан. Тус тулаанд өмнө нь өөрийнхөө болчимгүй үйлдэл болон сэргээшийн асуудлаас болж 2 ч удаа холбооноос шийтгүүлж байсан Жон Жонс ялж, үзэгчдээс ясны тулаанч гэсэн үнэлгээг авч байсан цаг саяхан. Тэрбээр тулааны гурав дугаар үед хүнд цохилтоор өрсөлдөгчөө дутуу гаргаж хугацаанаас нь өмнө ялалт авсан билээ.

Харамсалтай нь өнөөдөр түүний талаар таагүй мэдээлэл гараад байна. Учир нь тэрээр дахин сэргээшийн эсрэг шинжилгээнд бүдэрсэн байна. Өдгөө 30 настай тулаанчийн хувьд замнал нь энд хүрээд өндөрлөж ч болох талаар гадны эх сурвалжууд мэдээлж байгаа юм. Энэ талаар Нэгдсэн улсын сэргээшийн эсрэг агентлаг болон UFC тулааны холбоодууд албан ёсны мэдэгдэл хийжээ. Түүнээс авсан дээжнээс Туринабол буюу анаболик сэргээшийн төрлийн бэлдмэл илэрсэн гэнэ.

Жон Жонсын хувьд өмнө нь авто машины осолтой холбоотойгоор шийтгэл амсаж, мөн UFC 200-ийн тулаанаа сэргээшийн асуудлаас болж цуцлуулж, нэг жил октагонд гарахгүй байх шийтгэл амсаж байсан юм.

Б. Энх-Амгалан