Энэ сарын 21-ний өдөр байгалийн ховор үзэгдэл болох нар хиртсэн.  АНУ-ын Орегон мужийн нутаг дэвсгэрт энэ үзэгдэл тун тод харагдсан юм. Тэгвэл нар хиртэлтийн үеэр тус бүс нутагт мэргэжлийн усанд үсрэгчид цугларч, тусгай үсрэлт хийжээ. Ердөө 58 секунд үргэлжилсэн нарны бүтэн хиртэлтийн үеэр тэд өөрсдийн бэлдсэн тавцангаас тусгайлан бэлтгэсэн усан сан руу үсэрсэн байна.

Тавцангийн өндөр нь 66 фүүт буюу 20.1 метр байсан бол усан санд нийт 30.000 галлон (113.562 литр) ус бэлдсэн байна. Хэдийгээр энэ тавцангаас Дэлхийн цувралын шилдэг оролцогчид ээлж дараалан үсрэлт хийсэн ч нар бүтэн хиртсэн байх үеэр эмэгтэй тамирчин усанд үсэрсэн байна. Уг тамирчин нь Австралийн усанд үсрэгч Хелена Мертен байсан юм. Энэ жилийн Дэлхийн цуврал тэмцээн нийт 6 үе шаттай зохигдож байгаа. Улирлын 4 дэх тэмцээн ирэх 9-р сарын 3-нд АНУ-ын Форт Уорт хотод болно.

Г.Баяраа