Мэргэжлийн дугуйн гурван Гранд тур уралдааны нэг Вуэльта Испани нээлтээ хийлээ. Энэ жил 72 дахь удаагаа зохиогдож байгаа уг уралдаан Францын Ним хотод нээлтээ хийлээ. Нээлтийн гараа 13.7 км зайд багийн цуваа гараагаар үргэлжилжээ. Уг уралдаанд оролцож байгаа 22 багийн дугуйчид үзүүлсэн хугацаагаараа өрсөлдсөнөөс хамгийн сайн хугацааг БиЭмСи Рэсинг багийнхан үзүүлжээ. Тэд 23 минут 21 секундын хугацаанд замаа дуусгасан бол араас нь 6 секундын алдагдалтай Күйк Степ Флоорс, СанУэб багууд орж эхний байруудыг эзэлсэн байна.

Тэмцээний тэргүүлэгчийн улаан цамцыг ийнхүү БиЭмСи Рэсинг багийн Австрали дугуйчин Рохан Дэннис эзэмшиж эхэлсэн байна. Гурван долоо хоногийн хугацаанд үргэлжилж, 21 үе шаттайгаар 3297 км зайг туулах Вуэльта Испани уралдааны ялагч ирэх 9-р сарын 10-ны өдөр тодорно.    

Г.Баяраа