Раллигийн ДАШТ-ий амьд домог, Францын нэрт тамирчин Себастьен Лоеб Ситройн багтай хамт сорил хийжээ. Энэ нь ирэх долоо хоногт болох Германы гараанд зориулсан сорил байсан бөгөөд бүхэлдээ засмал замд хийгдсэн байна.  Францын багийн хувьд энэ улиралд хүссэн амжилтаа үзүүлэхгүй байгаа учраас үлдсэн 4 раллид  өндөр ач холбогдол өгч оролцоно гэж мэдэгдээд байгаа.

Дэлхийн 9 удаагийн аварга Франц эр өөрийн хамтрагч Даниел Эленагийн  хамт Ситройн Си-3 загварын машинаар Страсбург хотын ойролцоо сорил хийсэн байна. Цаг агаарын байдал ч тэдний хүссэнээр байсан бөгөөд үдээс өмнө бороо орж нойтон зам дээр хурдалсан бол үдээс хойш  хуурай зам дээр гарах боломж олдсон байна. Үр дүнд нь Ситройны инженерүүд Си-3 загвартаа хүссэн тохиоргоогоо хийж чадсан байна.

Ситройн багийн нэрийн өмнөөс энэ жил Их Британийн Крис Мики, Ирландын Крэйг Брийн нарын нисгэгчид уралдаж байгаа бөгөөд Мексикийн раллид түрүүлсэн ч бусад уралдаануудад хангалтгүй үр дүнтэй оролцоод байгаа билээ.

Г.Баяраа