Английн хөлбөмбөгийн шигшээ багийн хаалгач асан Пол Робинсон зодог тайллаа. Энэ жил 37 настай туршлагатай тоглогчын хувьд Бөрнли клубт мэргэжлийн тамирчны замналын сүүлийн жилээ үдсэн юм. Анх 1998онд Лидс Юнайтед клубээс мэргэжлийн тамирчны замналаа эхлүүлж байсан тэрбээр Тоттэнхэм, Блэкбөрн зэрэг багуудад тоглож, энэ хугацаандаа мөн Английн шигшээ баг дуудагдан 41 тоглолтод оролцсон байдаг.

Өнгөрсөн 2016 оны 1-р сард Бөрнли клубт нэгдсэн тэрбээр чадварлаг хаалгач Том Хитоны сэлгээнээс тоглож, Премьер лигт 3 тоглолтыг хийжээ. Клубын түвшинд 498 тоглолтыг хийсэн туршлагатай хаалгач уг нь зодог тайлах хүсэлтгүй байсан ч биеийн байдлаас шалтгаалан энэхүү шийдвэрийг гаргажээ.

Учир нь түүний нурууны гэмтэл бүрэн эдгэрэхгүй байгаа нь ийм шийдвэр гаргахад хүргэсэн байна. Робинсон 2006 онд Германд болсон хөлбөмбөгийн ДАШТ-нд оролцон тоглохдоо нийт 5 тоглолтын 4-т нь хаалгаа хуурай манаж байсан удаатай.  

Г.Баяраа