Японы мэргэжлийн сүмо бөхийн Нагоя башёгийн банцүкэг албан ёсоор зарлалаа. 7-р сарын 9-нд эхлэх башёд дөрвөн ёкозүно, гурван озэки зодоглохоор болсон байна. 2000 оны хаврын башёгоос хойш анх удаа ийм олон том цолтон нэг башёд зодоглосон тохиолдол болж байгаа юм байна.

Тодруулбал их аварга цолтой Хакүхо М. Даваажаргал, Харүмафүжи Д. Бямбадорж, Какирюү М. Ананд, Кисэносато, озэки цолтой Тэрүнофүжи Г. Ган-Эрдэнэ, Гоэйдо, Такаясү нар макүүчи зиндаанд баруун зүүн жигүүрүүдээс босч барилдахаар болсон юм. Тавдугаар сард амжилттай барилдсан Такаясү озэки цолтойгоор анхны башёдоо барилдаж, цолны нэр хүндээ хамгаалан барилдахаар болж байгаа нь чансаа өндөртэй энэ башёд маш их хариуцлагыг түүний нуруунд тохсон зүйл болох төлөвтэй. Үүнээс гадна Монголын сумоч Тамаваши Б. Мөнх-Оргил дөрөв дэх башёдоо дараалан сэкивакэ цолтойгоор барилдах гэж байна. Тэрбээр өнгөрсөн башёг 10 даваатай дуусгасан. Зуны башёд дахин 10-аас дээш  даваа авбал ирэх намар озэки цолны төлөөх анхны дайралтаа хийх аж  Харин озэки Котошогикү комүсүби цол руу унажээ. Түүнчлэн нагоя башёд дээд зиндаанд жюүрёогоос дөрвөн бөх дэвшин барилдаж байгаа юм. 2017 оны зуны башёд макүүчид Монголын есөн бөх барилдана. Манай маэгашира цолтой бөхчүүдээс Чиёошома зүүний тавд, Ичиножёо зургаад, Такаинова долоод эрэмбэлэгджээ. Харин Араваши зүүний 12-д бичигджээ. Жюүрёод манай гурван бөх барилдах бөгөөд Кёкүшюхо барууны манлайд эрэмбэлэгдсэн бол Азүмарюү зүүний гуравт, Сэйро барууны зургаад эрэмбэлэгдсэн байна. Макүүшитад Дайшохо, Кирибаяма, Миторюү, Асахирюү, Гочозан, Кагамио, Танэгашима нар барилдаж байна. Сонирхуулахад, их аварга Хакүхо 60 дахь башёдоо ёкозүна цолтойгоор зодоглох гэж байгаа нь сүмогийн түүхэнд хоёрдугаарт багтах амжилт болж байна. Түүний өмнө 63 башёд ёкозүна цолтой барилдсан Китаноүми аварга эрэмбэлэгдэж байна. Үүнээс гадна их аварга Хакүхо нагоя башёд 11-ээс дээш даваа авбал сүмогийн бүх цаг үеийн түүхэн дэх хамгийн олон даваатай бөх болно. Одоогоор уг амжилтыг озэки Кайо 1047 даваатайгаар эзэмшиж байгаа юм.

Б. Энх-Амгалан