Өнгөрсөн долоо хоног МотоЖП-н ДАШТ-ий Нидерландын гранпри болсон. Энэ уралдааны үеэр Мото 2 ангиллын Итали нисгэгч Лорензо Балдассарри осолд орж гэмтэл авсан. Өдгөө Гронинген хотын эмнэлэгт хэвтэж байсан тэрбээр хөлдөө мэс засал хийлгэсэн бөгөөд 8-р сарын эхээр болох Чехийн гранпри хүртэл уралдаанд оролцохгүй нь тодорхой болсон юм.

Тэгвэл Форвард рэсинг багийн удирдлагууд түүний оронд нутаг нэгт тамирчин Федерико Фулиниг уралдуулахаар болсон байна. Мото 2 ангилалд өмнө нь 3 удаа уралдаж байсан тэрбээр ийнхүү дахин нэг удаа замд гарч, Германы гранприд өрсөлдөх нь тодорхой болоод байна. 22 настай Фулини өнгөрсөн жил Япон, Испанийн гранприд оролцож 18-р байранд бичигдэж байсан нь түүний замналын хамгийн өндөр үзүүлэлт байсан аж.

Г.Баяраа